張兆輝招待長者包場睇賀歲片 獲讚善心又靚仔

踏入兔年趁疫情減退，市面一片喜洋洋，在港過年嘅張兆輝，向來敬老扶幼，今年亦不例外喺初四舉行一場慈善活動，包場招待長者們欣賞由甄子丹及張兆輝參與演出嘅賀歲片《天龍八部之喬峰傳》，片中動作連場，諗唔到一眾「老友記」對打到飛起嘅場面，睇到既緊張又開心不時拍掌。

張兆輝今次請睇戲係對長者們一點心意，覺得長者對社會有唔少貢獻，值得尊敬及關懷，所以今年新春佳節，一齊睇電影娛樂，亦希望新一年香港電影業回復興旺，觀眾多啲入場欣賞。

入場前唔少長者爭相要求與輝哥合照，一位婆婆讚輝仔善心又靚仔，本身好鍾意佢，張兆輝亦來者不拒，氹得大家笑得人人四萬咁口；張兆輝新一年希望隨著生活開始復常，最重要係世界和平，星光再度燦爛、身體健康、疫情永離。