陳慧琳去年車禍曾令臉上留疤 今日曬出靚相面部依然白滑

陳慧琳去年12月中同13歲大仔「蝦餃仔」劉昇不幸撞車送院，據知當時Kelly臉部、手腳都有擦傷，而蝦餃仔則面部撞瘀。

今日Kelly就喺社交平台上載咗一輯靚相，仲留言講返呢輯相係自己發生車禍之後嘅第一個photo shooting，Kelly話當時自己塊面仲未完全消腫，而擦損位置亦有啲刺痛。由於呢次拍攝係喺車禍發生前接落，為咗唔想影響到客戶，所以Kelly話自己唯有抱住樂觀嘅態度去迎接工作。

Kelly話當日以戰戰兢兢嘅心情去到攝影嘅地方，仲話當時一入門口就已經見到王丹妮喺度影緊相，呢個時間Kelly嘅內心就上演咗一場小劇場，當佢仲驚大家見到佢面上嘅傷疤時，成個攝影團隊就好似若無奇事咁同佢打招呼，Kelly即刻放低咗心頭大石，佢仲好搞笑咁描述返當時同大家打招呼嘅情況：「Hello⋯⋯心諗佢哋好似見唔到我達𤶸喎⋯⋯Yes，過咗第一關。」之後Kelly話當見到品牌嘅同事拎出一盤盤嘅珠寶之後，佢連自己受咗傷呢件事都已經完全秒忘咗，非常搞笑。

Kelly可能係兔年行好運嘅關係，令佢遇到好嘅攝影師、燈光同場地，而影出嚟嘅相佢亦相當滿意。最後Kelly仲祝和位兔年吉星拱照，最重要嘅係出入平安呀！