《中年好聲音》集結團拜整甜品 支嚳儀鮑聖光互爆貪靚秘密

《中年好聲音》集結團拜整甜品 支嚳儀鮑聖光互爆貪靚秘密

新年當然要一團和氣,所以即使喺節目《中年好聲音》中,一眾參賽者為咗20強嘅席位而鬥得幾犀利都好,佢哋喺節目外其實好好感情。呢日主持 Edmond許文軒 就約埋支嚳儀、鮑聖光、羅啟豪、彭澤英、何博文同涂家堯幾位《中年》參賽者一齊團拜,兼去到支嚳儀嘅主場整賀年甜品!

身為烘焙師嘅支嚳儀,喺現場負責指導眾人,令大家變成為「中年好師傅」製作甜品,當中涂家堯無論篩粉定唧cream都有板有眼,六位夾手夾腳好快就整起三款唔同嘅甜品喇!而由於初七係人日,支嚳儀就特意準備咗幾個蛋糕同大家慶祝,兼祝觀眾們人日快樂呀!

六位因為參加節目而結緣成為朋友,Edmond就準備咗個小遊戲測試一下佢哋嘅默契,當中講到要佢哋選出「最貪靚」嘅成員時,鮑大人即爆料話某君貪靚嘅程度,係要將眼睫毛分成幾段嚟貼,坐喺鮑大人隔離嘅支嚳儀即時心虛以畫簿遮面,點知就畀Edmond睇到佢當日嘅眼睫毛真係有幾層,令支嚳儀尷尬咁笑謂:「咁樣先炯炯有神,你識咩吖!」然後佢再禮上往來爆返鮑大人都相當貪靚,每次喺化妝間準備時,對方都會同髮型師講自己個頭想set、啲頭髮要幾攣。

至於要佢哋選出「最想保護」嘅成員時,彭澤英竟然話想攬實保護羅金榮,而何博文就指想保護好似BB咁cute嘅彭澤英!想知點解?Click入去睇完整訪問片段啦!


羅啟豪新歌速登音樂平台首位 MV鬧市取景令「社恐」有所改善

羅啟豪 新歌《相信相信》3月26號正式面世,新歌推出短短兩個半鐘就已經登上音樂串流平台排行榜首位,令Ramon都喺社交平台出Po話難以置信。而Ramon一班歌迷仲帶埋大型電視到電視城外,同偶像齊齊睇MV首播,令Ramon都忍唔住落下男兒淚,笑指:「我參加比賽咁耐都冇喊過一次,啲人以為我係冷血嘅。」

而Ramon亦都坦言,自己睇落好似對所有人都擺出一樣嘅面孔,所以唔容易顯示真正嘅自己。佢更感性同大家講:「冇大家嘅支持,我唔會撐到而家。」

Ramon新歌MV都花足心思投入拍攝,更穿梭港九鬧市以Busking方式取景,呢個體驗唔只好玩,Ramon仲覺得自己嘅「社交恐懼症」已經改善唔少,即使被途人圍觀都再無怯場感覺。

呢首歌作為Ramon第一首個人單曲,新歌歌詞都同佢嘅人生非常貼合,其中一句「從睡房到大舞台」就令Ramon認為完全係佢由素人變成《中年好聲音》參賽者嘅寫照。

 相關推薦

熱門搜尋