一連八集嘅賀歲短劇《黃金萬両》，今晚年初七播出大結局。而初六晚播出嘅一集，萬紫千紅( 薛家燕 飾)要求三個寶貝囝做好麵店，又決定以當日嘅生意額分勝負，而三個新抱龍九( 麥美恩 飾)、小玉( 朱智賢 飾)同金枝( 江嘉敏 飾)就各出奇謀為老公催谷生意，不過三房人出盡旁門左道破壞萬家傳統，搞到有客人食完麵後身體不適，結果三兄弟萬帥( 曹永廉 飾)、萬年( 黃子恆 飾)同萬世( 馬貫東 飾)被送入衙門。

千紅責備三子忘記初心，而大感慚愧嘅三子最終合力為媽媽煮麵，和氣收場。後來佢哋各自向老婆坦白，想放棄爭奪金大碗，點知妻子們就即時反對，最後三對夫婦大吵一場，搞到新年流流又話要休妻、和離同休夫…… 

而今晚大結局，焦點自然落喺三對夫妻身上，三妯娌發毒誓唔會原諒老公，而三子亦承諾唔會心軟，但係佢哋又先後相繼和好，結果又要互相隱瞞，引發連串笑料。 本劇最大謎團「金大碗之謎」亦會喺今晚揭盅，結果令人意想不到。

大結局另一焦點，係家燕姐同劇中老公李成昌上演親熱戲，久未拍劇嘅家燕姐早前受訪時曾透露，已有成20年冇拍過親熱戲，仲笑言拍攝時怕醜面紅兼心肝仔卜卜跳，想知呢場親熱戲有幾激烈爆笑？就要留意今晚《黃金萬両》大結局播出喇。 

《黃金萬両》劇情搞笑又溫馨，一班演員拍攝時亦相當愉快，官方連日來先後公開出爆笑花絮片，戲裏戲外都充滿歡樂，家燕姐係劇組「搞笑擔當」，除咗唔記得對白時會腦筋急轉彎即興自創，又會大講「鴨仔話」；另外江嘉敏就被「派錢幫你充撐場面」呢句對白連番考起瘋狂 NG，仲搞笑地自封垃圾打圓場。至於黃子恆、朱智賢就非常遴迍，先係戴着財神帽嘅子恆將頭飾揈向智賢俏臉，搞到對方Con都甩咁滯， 之後抱抱時智賢嘅髮髻又勾住子恆嘅財神頭飾，最終要出動工作人員打救，場面搞笑。

《黃金萬両》大結局 今晚(年初七)20:30 翡翠台

台慶劇《叠影狙擊》，今晚九點半翡翠台播映大結局。最期待的畫面要數曉晨與梁曦兩姊妹，在貨𨋢以手槍互相對峙的壓軸「無間道式」對峙！周秀娜受訪時自言該幕戲印象深刻：「我要演晒兩姊妹，嗰場戲淨係換衫都換咗幾次，加上梁曦要解釋點解設局攞曉晨身份，同埋又要發洩情緒，表現癲癲哋嘅狀態！我又拍咗好多take，揸槍之餘仲要兼顧做戲好攰！」

談到姊妹持槍對峙一幕，有幾分似電影《無間道》中梁朝偉、劉德華的天台對峙戲，周秀娜說：「《無間道》咁經典，大家睇到呢啲場面當然會諗起套戲，我知道導演好鍾意《無間道》，唔知係咪特登致敬呢？」至於大結局其他重點，自從梁曦霸氣回歸兼被揭是金先生一手栽培的金夫人後，她先殺害沈飛飛（朱鑑然飾），再耍計令晟杰、曉晨陷入困境，究竟今晚曉晨能否避過一劫？深愛着曉晨的晟杰和文諾亦會決一死戰，最終曉晨情歸何處？

重溫昨（6日）晚一集，Mag姐（張慧儀飾）、「金先生」楊俊傑（關禮傑飾）被警方發現洗黑錢罪證，Mag姐向警方供出梁曦（周秀娜飾）是「金夫人」，由於梁曦一直扮死，借用其身份的孖生家姐魏曉晨（周秀娜分飾），則被警方邀請協助調查。另邊廂，俊傑的妻女被梁曦綁架，俊傑為此活捉曉晨，跟梁曦在貨倉交換人質，雙方爆發激烈槍戰，趕到的晟杰（黃宗澤Bosco飾）、曉晨被梁曦捉走，原來梁曦欲借涂文諾（黃浩然飾）之手殺死曉晨，並借屍還魂以曉晨的身份生活……