孫慧雪適逢初七人日開心同大家分享喜訊,宣佈陀B三個多月,大仔Riley升呢做哥哥,佢覺得每個小生命都得來不易,所以要惜緣感恩,雪雪目前已感受到做二寶媽唔容易,同上次陀B一樣肚仔好大。
片中見到雪雪同大仔Riley身穿粉紅色冷衫母子裝,幸運滿瀉,全程被阿仔哄得哈哈大笑,塊面明顯比之前圓潤咗,而Riley好乖咁捐入媽咪件冷衫裡面,錫媽咪嘅孕肚,雪雪受訪時透露預產期係7月。
雪雪曾接受網台節目訪問,曾透露結婚之前曾發現患「子宮肌瘤」,當時醫生批「冇得生」,雪雪喺醫院爆喊,頓時感覺成個人跌落黑洞,佢想要BB,後來孫慧雪做咗治療,令子宮肌瘤縮小,增加「懷孕機率」,接受治療一段時間,令其女性荷爾蒙停咗,要靠打針去恢復月經及排卵,終於成功懷孕,上一胎陀B時,有一日去廁所時流血,立即到醫院求醫,醫生建議雪雪打黃體酮針安胎,停工喺屋企養胎,2017年成功誕下兒子Riley。