陶大宇人日行善送暖 向基層派飯過年陪家人

新年雖然係一家人團圓嘅喜慶日子，不過唔少基層可能繼續面對各種困難，任何時間都需要大家施以援手。而 陶大宇 就喺年初七人日，喺深水埗向基層同長者派飯，希望小小付出可以令有需要嘅人感到溫暖喇。

原來大宇不時都會出心出力做類似活動，佢又話要多謝一班朋友同相關團體協助同幫忙呀。今年過年大宇留喺香港同家人一齊度過，因為平時都係麻煩阿哥阿嫂幫手打理家事，所以過年就一定要喺屋企慰勞大家做乖仔喇。

往後北上開工同返港都唔使隔離，大宇就話慳返唔少時間可以休息多啲喇，佢仲話兔年已經有唔少工作安排，不過就會留港多一排先再開工喇。