兔年伊始，大家都對新一年有唔少期許，回顧過去一年，可能未盡如人意，不過有豐富經歷之後回望，先係精彩人生。呢日《StarTalk》嘉賓，就有去年大個仔榮升老公同爸爸嘅 吳浩康 ，即將準備結婚嘅 沈震軒 仲有繼續專注音樂發展嘅 艾妮 同大家分享兔年願望喇。

主播 鞏姿希 一開始就問到阿Deep榮升人父嘅感受，一面幸福笑容嘅佢仲分腳囝囝乳名嘅由來，新身份迎接新一年，責任加重之餘一提及小朋友就滔滔不絕，仲話照顧小朋友嘅困難，同太太一齊合作同互相體諒之下，就成為夫妻之間嘅另一種浪漫喇。

而同女朋友 陳欣妍 拍拖已經5年嘅Sammy，呢日亦都提到對結婚已經有計劃，仲話大日子已經不遠喇。而離港兩年多，決定回流香港發展嘅佢，仲話會為女友加強儀式感，好好安排終生大事，仲話已經一直向身邊幸福嘅家庭取家經咁話呀。Sammy呢日仲同各大男士分享點樣努力求生，喺女伴英明指揮安排之下好好生活喇。

聽到非常開心對兩位師兄表現非常滿意嘅艾妮，就提到過去一年自設影片頻道，對自己帶嚟非常大得著，而新一年仲話會專注喺包辦音樂創作上，仲話希望往後嘅Cover都由自己改編呀。

不過專訪齋講工作又邊到得吖？佢身邊兩位師兄仲搶答，幫大家問Elly感情狀況，更加即場公開自己擇偶條件呀。

除咗家庭生活之外，新一年佢哋都有唔同目標，好似阿Deep就會專注戶外活動嘅新頻道，而Sammy就打算年內參加健美比賽同展開新生意，仲打算踏入幕後，而Elly就會事隔兩年再推出HiFi唱片，仲會去日本錄音呀。

英皇娛樂喺7號晚舉行開年飯敍，除咗英皇集團主席楊受成博士、英皇集團副主席楊政龍、英皇娛樂集團行政總裁許佩斯、英皇娛樂集團營運總裁霍汶希、英皇娛樂集團執行副總裁張雅麗外，英皇娛樂號旗下藝人：容祖兒、張敬軒、蔡卓妍、李幸倪、泳兒、關智斌、溫碧霞、周勵淇、吳浩康、何珮瑜、沈震軒、湯怡、許靖韻同曾樂彤等都有出席。

由於疫情漸趨穩定，加上社交距離措施放寬，所以呢晚邀請咗近百傳媒出席，集團主席楊博士仲帶領一眾藝人同大家拜年，希望大家今年可以：「發過豬頭炳呀！」

而Mani亦開心表示因為因為疫情關係，佢哋已經有成三年冇搞飯敍，直到最近疫情穩定，先決定再次舉行飯敍，Mani話：「都好希望可以同傳媒朋友聯誼一下，加上又有新嘅媒體都好想認識，又咁啱好多artist都喺香港，所以今年真係好熱鬧。」