StarTalk|阿Deep婚後過年大談幸福生活 沈振軒有意拉埋天窗艾妮公開求偶遇

StarTalk|阿Deep婚後過年大談幸福生活 沈振軒有意拉埋天窗艾妮公開求偶遇

兔年伊始,大家都對新一年有唔少期許,回顧過去一年,可能未盡如人意,不過有豐富經歷之後回望,先係精彩人生。呢日《StarTalk》嘉賓,就有去年大個仔榮升老公同爸爸嘅 吳浩康 ,即將準備結婚嘅 沈震軒 仲有繼續專注音樂發展嘅 艾妮 同大家分享兔年願望喇。

主播 鞏姿希 一開始就問到阿Deep榮升人父嘅感受,一面幸福笑容嘅佢仲分腳囝囝乳名嘅由來,新身份迎接新一年,責任加重之餘一提及小朋友就滔滔不絕,仲話照顧小朋友嘅困難,同太太一齊合作同互相體諒之下,就成為夫妻之間嘅另一種浪漫喇。

而同女朋友 陳欣妍 拍拖已經5年嘅Sammy,呢日亦都提到對結婚已經有計劃,仲話大日子已經不遠喇。而離港兩年多,決定回流香港發展嘅佢,仲話會為女友加強儀式感,好好安排終生大事,仲話已經一直向身邊幸福嘅家庭取家經咁話呀。Sammy呢日仲同各大男士分享點樣努力求生,喺女伴英明指揮安排之下好好生活喇。

聽到非常開心對兩位師兄表現非常滿意嘅艾妮,就提到過去一年自設影片頻道,對自己帶嚟非常大得著,而新一年仲話會專注喺包辦音樂創作上,仲話希望往後嘅Cover都由自己改編呀。

不過專訪齋講工作又邊到得吖?佢身邊兩位師兄仲搶答,幫大家問Elly感情狀況,更加即場公開自己擇偶條件呀。

除咗家庭生活之外,新一年佢哋都有唔同目標,好似阿Deep就會專注戶外活動嘅新頻道,而Sammy就打算年內參加健美比賽同展開新生意,仲打算踏入幕後,而Elly就會事隔兩年再推出HiFi唱片,仲會去日本錄音呀。

Mayanne小喇叭丨岑麗香分享湊仔驚險事 李亞男驚爆大女Gabby話「爸爸好短」

TVB清談節目《Mayanne小喇叭》今晚(28日)播出嘅呢集,麥美恩請來兩位同樣來自溫哥華嘅選美界好姊妹岑麗香同李亞男擔任嘉賓,開心share仔女經。Mayanne喺節目中透露同香香結緣係因當時自己喺溫哥華機緣巧合下做咗溫哥華小姐保姆,因而成為好友。
Leanne 開心大爆自己當年上祖藍嘅廣東話堂時有特權。

香香同李亞男平時望落溫柔又賢淑,私下卻流住瘋狂嘅血液,香香分享近日看似日常嘅「帶住細路接哥哥放學」事件,表情十級誇張,講到肉緊更忍唔住越講越大聲;更因不諳廣東話將「跌咗個玩具」不斷講成「跌咗個Toy(胎)」,令全場爆笑。香香嘆氣:「開頭冇嘢嘅,細仔乖乖咁坐喺度,咁Bus mom(校車褓姆)會遞書包畀你,因為(大仔)五歲仲係好細個,你要Hold住佢跳落嚟,咁你就(不其然)放低咗另一個架喇。我一放低咗細嗰個,佢就調頭跑,跟住我就大叫Stop,佢就向住我笑,調頭再跑,癲咗呀!」

Mayanne 話曾經因為做咗一件事,覺得自己出賣咗香香,咩事咁大件事?

香香當時拖住大仔Jacob,只可以拉住大仔追趕細仔,豈料大仔卻喺緊要關頭「跌咗個toy」,當時香香望到有架的士迎面而來,只能爆Seed保護兒子:「我好似慢鏡咁,即刻的起個仔攞埋個Toy,跟住架的士就過咗。呢個時候個細仔仲跑緊,跟住我就癲咗大叫Julias,我都見到啲街坊轉過嚟望住我,見到我滴晒汗。」Mayanne聞言即笑指若身處現場、必定舉機拍攝難得一見嘅「岑麗香咆哮」一刻。香香喺分享御夫術時亦相當爆笑,笑言有句「御夫必殺金句」,令老公強強任勞任怨:「我老公係惡嗰個嚟,我會成日都讚佢『好x呀』,『你識教佢哋執枱,好x呀』、『嘩!男人幫小朋友沖涼,好x呀』,咁佢就會好願意去做啲事。」
 
香香連講接阿哥放學都可以講到咁眉飛色舞,同佢做朋友一定好歡樂。

至於李亞男嘅瘋狂搞笑程度亦不遑多讓,自揭當時祖藍為華姐擔任廣東話導師時,李亞男竟然享有驚人特權。結婚多年仍愛得甜蜜嘅李亞男,曲線大數祖藍好處:「其實揀老公要睇吓佢係咪愛你啦,有冇愛埋你屋企,愛埋你啲朋友,同埋係咪專一嘅人,孝唔孝順。」講講吓仲反問Mayanne:「我鍾意唔等於你鍾意㗎喎,我畀個老公你,你要唔要吖?」之後又同香香一樣七情上面、搞笑地自揭喺屋企最愛騷擾老公,並高八度「慳啲啦Baby」上身話:「我喺屋企好似喜劇演員,會話:『老公,你同我玩吖!』」講到興奮過籠自知失儀嘅李亞男,又會突然煞掣掩嘴話:「Oh  sorry!」名副其實Drama Queen 。

Leanne 爆大仔 Gabby 覺得爸爸好短。

講到兩個囡囡時,Leanne再度發揮搞笑本色,大叫「我愛奶奶」之餘,爆大女Gabby成日話爸爸好「短」:「喺佢心目中,爸爸係好短嘅,『媽咪高,爸爸短』,我就話:『唔係,唔好咁講,爸爸矮啫』。」Mayanne聞言笑到面都紅晒之餘,更忍唔住質疑:「矮同短有咩分別?」想進一步知道Gabby眼中嘅王祖藍係點樣,同埋Leanne點解會愛爆奶奶,仲笑言可將「奶奶」借畀香香應急?。

香香因為一句「跌咗個 Toy(胎)」,令到全場笑到失控。

《Mayanne小喇叭》逢周四、周五晚上10:30翡翠台

 相關推薦

熱門搜尋