鄭欣宜 推出今年第一首派台歌《仍會等》，MV由三個有關「寂寞」嘅故事組成，其中 柯煒林 經歷與另一半 莫竣名 嘅生離死別、而身處挪威嘅少女 余淑培 就獨自面對陌生新生活，加上欣宜完成工作後回家，一個人透過窗外觀察別人生活思考人生。欣宜拍攝時仲輕易按導演要求兩度落淚。

欣宜拍攝新歌MV，兩度應導演要求當場淚灑
欣宜話對新歌《仍會等》可謂「一見鍾情」，佢話： 「新歌由 謝芊彤 作曲同填詞，我非常之非常之喜愛，我嚟緊嘅新專輯入面，最能夠代表到內心深處嘅狀態。當我收到呢首歌嘅曲同詞嘅時候，就第一時間用手機錄片，好想分享我有幾咁喜愛呢首歌。」

欣宜又話有時時會獨坐喺屋企窗前，留意別人生活同思考人生，佢話：「我好鍾意喺屋企嘅窗望向其他單位，有時會見到一對情侶睇電視、小朋友做功課、媽媽喺廚房洗碗。鍾意睇其他人嘅生活，然後會諗佢哋會諗咩？每次聽到呢首歌，我都會有一種感覺，完成一日工作一個人喺屋企返到最簡單、最原本嘅自己嘅時候，我會諗啲咩？擔心啲咩？不過無論如何，到最後就算有擔心和憂慮，鄭欣宜都係樂觀同有希望嘅！所以呢首歌對我好重要。」

鄭欣宜相隔九個月後再度舉行演唱會，首場演出於昨晚開鑼，全場氣氛熾熱，欣宜亦唱出多首hit歌，炒熱全場。