梁朝偉自揭克服社交恐懼症3招 剖白愛演戲真相：發洩壓抑情感

梁朝偉一向作風低調，上月底卻忽然進駐抖音，跟網民分享日常生活點滴，開賬戶短短幾日再吸引逾200萬粉絲，了解不一樣嘅梁朝偉，今日將播出《這一刻，梁朝偉對你說》嘅短片，講影帝偉仔點解咁鍾意拍電影！

梁朝偉喺抖音短片親口承認自己有社交恐懼症，與好動善於交際嘅老婆劉嘉玲，二人性格截然不同，片中指佢作為「老社恐人」點樣去克服，偉仔示範喺公眾場合常用嘅三大絕招：「第一招『微笑』、第二招『揮手』、第三招『畀心』。」同時片中配上以往佢出席公開場合嗰陣，真係使出呢三招，證明佢社交恐懼症發作就要出招克服，偉仔最後更貼心問：「你學會嗎？」

最新一段影片《無間道》電影系列打摩斯密碼嘅經典場口，預告今日將有一段《這一刻，梁朝偉對你說》，偉仔喺預告片坦言由細開始好享受一個人獨處，從來冇改變過，更剖白熱愛電影同拍戲嘅原因：「電影就是對我來說，小時候我在電影院一百二十分鐘裡面，可以暫時離開現實生活，我可以完全在一個電影世界裡面。我覺得我非常幸運可以進入演員這個行業，演戲是可以把我壓抑的情感完全發洩出來。對我來說，演戲就是我生活的一個平衡。」相信影迷可以從偉仔嘅抖音片，更了解偉仔真實內心世界！ 

其實今次拍抖音片對梁朝偉嚟講係一個大挑戰，佢喺片中講過「梁朝偉其實也沒有甚麼特別」，只係偶爾發呆，偶爾將自己收埋，梁朝偉認為大家望佢對眼睛好似識講嘢，或者係因佢本身不善言辭去表達自己，初次見面成個人會緊張，人多嗰陣又會不知所措，佢有時好多話想同別人分享，但唔知道點開口，佢續道：「既然我的眼睛可以說話，那我就這樣一直看著你就好，不止有說話的眼睛，也有想見你的心。」