張敬軒日前獲過千歌迷提早同佢慶祝42歲生日，經過連串慶祝活動，呢日佢同周興哲、馮允謙、陳蕾及林愷鈴出席活動時，軒公大讚生日過得好開心，今年收到老闆送手錶，又有朋友請食飯，軒公確診後特別注重身體健康，之後佢會多做運動鍛煉體魄。

軒公嚟緊出發去倫敦開騷，透露與父母同行，原來係首次一家三口外遊，為方便照顧同行嘅父母，外傭遮遮亦會隨行，軒公希望住喺有廚房嘅地方：「老竇鍾意包餃子，去世界任何一個角落，佢都係要包餃子，我會帶『遮遮』過去，因為想多一個人照顧爸爸，『遮遮』煮嘅全部都係澱粉，啱呀！好啱澱粉放題。」

周興哲同馮允謙分別喺紅館舉行首個演唱會，周興哲最近勤操練為騷肌作準備，將喺香港辦粉絲見面會，與VIP粉絲玩遊戲互動，屆時亦會唱多首歌，佢預告畀香港歌迷一個驚喜，到時唱廣東歌；馮允謙返加拿大過農曆新年後回港，自爆增磅不少，近日工作忙不停，又要準備推出新作，今次佢幫女友出錢訂機票，讓女友3月到港睇騷。

年初七係人日，傳統上係代表每個人嘅生日，所以周興哲、草蜢、JW王灝兒、衞蘭、梁漢文同埋樂隊 Supper Moment，去到澳門出席賀年演唱會時，都各自準備咗一份禮物送畀現場觀眾，加上呢個演出係澳門防疫政策放寬後嘅其中一個大型演出，所以吸引咗大批觀眾嚟欣賞，氣氛相當熱鬧。
Supper Moment 為演唱會打頭陣。
演唱會由 Supper Moment 打頭陣，由於主音Sunny 早前榮升人父，所以擔任大會主持嘅 Bob 林盛斌即為對方送上祝賀，而Sunny亦有分享升呢做爸爸嘅心情，佢仲話呢個角色雖然唔易做，但係就相當開心，Sunny仲話好在其他成員都已經係爸爸級，所以遇到有咩問題都會向佢哋請教。
周興哲為大家送上「心想事成」揮春。
下月將會喺香港舉行首個紅館演唱會嘅台灣歌手周興哲，演出第一首歌《怎麼了》嗰陣，因為現場音響突然發生故障而冇聲，要主持阿Bob上台同觀眾解釋。之後周興哲重新獻唱多次《怎麼了》同埋拎咗金馬奬最佳原創電影歌曲嘅《想知道你在想什麼》，佢仲叫現場觀眾識唱嘅跟住一齊唱。演出後主持 Bob預祝佢香港嘅演唱會演出成功，周興哲就言自己都好期待今次館演唱會，仲話而家每日都忙住為個唱準備。
草蜢以勁歌熱舞作為壓軸演出。

呢晚演出嘅仲有JW、衞蘭同梁漢文，其中梁漢文除咗唱出多首經典名曲外，佢仲特別獻唱咗一小段黃梅戲，令觀眾甚為驚喜。而壓軸演出嘅草蜢，以一輪勁歌熱舞令全場氣氛推到頂點，除咗同場觀眾又唱又跳之外，佢哋仲好有心思咁將禮物隨機貼喺現場嘅座位上，令在場觀眾紛紛開心尋寶。

梁漢文亦係當晚表演嘉賓之一。
JW 為大家送上金扇。衞蘭為大家送上桃花。