港台團拜丨馬仔嬲心悠秘婚冇喜帖又冇餅咭 笑言蜜月期後要大興問罪之師

港台團拜丨馬仔嬲心悠秘婚冇喜帖又冇餅咭  笑言蜜月期後要大興問罪之師

劉心悠早前驚爆婚訊,閃嫁細佢幾歲嘅圈外另一半,由於保密功夫做得太好,所以消息唔只震驚網民,連佢嘅好友 馬浚偉 都話事前完全唔知情,佢扮晒嬲咁笑住話:「好明顯唔係好朋友啦!我都唔知!」馬仔指連對方老公係邊個佢都唔知,仲話心悠淨係同佢講自己要去讀藍帶,馬仔回想當時因為佢哋嘅套劇延期,撞咗心悠返學嘅時間而令對方退出劇組,馬仔話當時心悠淨係同佢講要返學,對方冇講過原來係去結婚,馬仔話自己收唔到喜帖都算,笑住透過鏡頭同心悠講:「餅咭都畀張吖心悠,枉我咁對你,你餅咭都畀張我吖,你唔係代言緊一間㗎咩?」馬仔話等心悠蜜月期完咗之後,就會對佢大興問罪之師,仲話到時會請佢食餐飯,趁機見下對方老公呀!

馬仔又話今次雖然心悠未能夠演出佢套劇,但希望將來會有其他作品可以再搵對方合作。問到下次見到心悠,會唔會問下對方係咪雙喜臨門,有BB所以結婚?馬仔即話自己連對方結婚都唔知,又點個佢係咪有咗?仲叫記者自己問返對方呀。

瓣數多多嘅馬仔,除咗繼續兼顧幕前同幕後工作外,佢仲回歸校園報讀咗兩個課程,不過之後竟然傳出佢假借讀書之名,其實係想移民嘅想法,呢日馬仔就再次解釋,就話自己冇其他國籍,亦從來冇移民嘅想法。

而同場嘅林智樂,就同大家分享新一年嘅工作安排,除咗會做主持工作外,稍後仲會出新歌,叫樂迷敬請期待呀!

薛家燕獲電台同事賀74歲大壽 生日願望心急兩女兒有著落

今個月底30號就係 薛家燕 74歲大壽,家燕姐向來人緣廣,呢日佢返電台開咪時,一眾同事就搞咗個小派對為佢提早慶生,仲獲得多位高層親臨祝賀,大家唔止送上鮮花同手製蛋糕,仲送上印有家燕姐肖像嘅4張J字啤牌,寓意家燕姐得到一手好牌,得心應手,氹得家燕姐又開心又感動。

家燕姐感激同事送上嘅心意,特別係 馬浚偉 嘅悉心安排,令佢最感動係生日卡上收集咗所有同事嘅簽名,佢會將呢張卡好好保存。家燕姐話每年電台都會為佢舉行大型生日會,延開幾十圍好熱鬧,但礙於今年工作密麻麻,決定延遲到五月初才舉行生日會,屆時仲會同天下母親一齊預祝埋母親節。

至於正日生日,家燕姐就會同屋企人出埠到韓國度假,生日願望係「香港經濟復甦,人人有工開,最緊要身體健康,可以享受人生。」另一個生日願望家燕姐就好着緊兩個女兒嘅感情狀況,坦言希望有好消息。一直流傳家燕姐有位Honey喺身邊,講到今次韓國之旅會唔會與Honey同行?家燕姐就好搞笑話:「唔知道,等阿女安排,睇吓邊個Honey鍾意食韓國嘢啦。」

 相關推薦

熱門搜尋