佘詩曼早前拍《延禧攻略》飾演嫻妃喺內地爆紅，主力於內地發展，早前阿佘透露過若有好劇本便會回TVB拍劇，近日有傳TVB監製鍾澍佳落實開拍新題材劇集《NEWS新聞女王》，盛傳由阿佘、李施嬅、高海寧及何依婷出演，雖然未知阿佘係咪接拍，不過佢近日留港爭取時間與好友相聚。

阿佘貼出與Toby細仔Rian嘅連環圖。

阿佘噚日於IG貼出與Toby（梁靖琪）細仔Rian嘅連環圖，見Rian眼仔大大，相當可愛，難怪契媽阿佘抱住佢係咁影，阿佘更留言：「細細契仔可唔可以畀面望吓鏡頭呀？！下次我一定會利誘佢。」阿佘亦貼出好姊妹湯盈盈攝鏡嘅相，叫盈盈唔好搞搞震。
阿佘與Rian一樣咁可愛，阿佘維持凍齡肌膚，更顯青春少女。

吳啟華於1998年演《妙手仁心》程至美，成為「師奶殺手」，當年拍《倚天屠龍記》演男主角張無忌，與黎姿飾演趙敏，佘詩曼飾演周芷若陷入三角戀，吳啟華近日接受內地電台節目《麗人麗語》訪問，透露當年TVB高層想佘詩曼演趙敏，黎姿演周芷若，吳啟華提議互換角色。

吳啟華現身《萬千星輝頒獎典禮2022》頒最受歡迎電視拍檔獎項。

吳啟華覺得佘詩曼啱啱出道有啲Baby Fat，黎姿就有啲異域風情，吳啟華又指黎姿較有「公主氣」，佢讚佘詩曼演技較好，演繹出周芷若邪惡一面，佢表示：「阿佘嘅演技比黎姿好啲，周芷若好難演。」；吳啟華記得試過有次外景車休息，突然黎姿「嘩」大叫，嚇到其他人跳起身，原來有一隻黃蜂定係飛蟲喺黎姿身上。 
吳啟華親解外界傳佢「賭癮大」，吳啟華當年訓練班畢業，成日跟師兄湯鎮業打牌，一日輸1000元，人工嗰陣得2200元，吳啟華認為「越驚輸就越容易輸」，因為成個人唔冷靜，只要唔介意輸贏當係玩遊戲便可。

吳啟華拍過不少經典劇集，當年與黎姿、佘詩曼拍攝劇集《倚天屠龍記》。

吳啟華目前當賭博係玩遊戲：「試過訓練班剛畢業，去澳門拍時裝劇，接觸賭場呢樣嘢好新鮮，入去賭，輸到撳晒銀行啲錢出嚟，輸到$0係幾咁慘，廿幾歲嗰時，冇錢坐船返香港，拍戲啲人走晒，得我一個喺澳門。」吳啟華指當時跟神講自己手上剩2元，想贏多幾十蚊買船飛返香港，後來中咗千幾蚊，因為呢次控制唔到自己，日後佢就有限制自己賭幾多錢，譬如賭3萬輸咗就唔玩，當作係娛樂費，佢笑指而家贏多過輸。

吳啟華近日接受內地電台節目《麗人麗語》訪問。

吳啟華回望娛樂圈發展，笑言如果再嚟一次，佢會搏命搵一個好嘅經理人，自言簽過幾個都覺得麻麻哋，吳啟華解釋：「一個好經理人好似『老竇』咁，話畀我聽人生應該係點，鋪好晒，有一個好嘅經理人，同有一個唔好嘅經理人差好遠，起碼有一條明路，我嗰時冇人話我知呢啲嘢。」吳啟華坦言近10年喺內地工作發展收入不錯。
現年58歲嘅吳啟華保養得宜，少食肉類、多食菜，有時跑步及游水，佢回想入行初期好少講嘢，本身性格比較慢熱，目前改變咗好多。