新一季《沖遊泰國》返嚟喇！經過疫情洗禮之後正式通關，泰國呢個香港人最愛嘅旅遊地點相信已經有唔少變化，一連20集節目星期一起喺 J2 同大家見面，除咗繼續有 胡慧沖 之外，大家喜愛嘅「叉燒姐」  鄺玲玲 同「冬蔭家族」嘅「冬蔭妹」、「冬蔭妹妹」仲有「冬蔭哥哥」亦都會繼續現身，加埋大碼版嘅胡慧冲「冲為糊」一齊為大家介紹各式好去處。

6號晚播出嘅《冲遊泰國》新一季首集，「叉燒姐」鄺玲玲會打頭陣同Roger介紹泰國食玩買之選。頭兩集仲會集中介紹曼谷美食，無論係豐儉由人嘅地道60銖(約14港元)一客海南雞飯，到酒店餐廳出品3000多銖(約713港元)港式蒸魚應有盡有。叉燒姐亦會出場帶大家去全泰國最高嘅建築物Bangkok Mahanakhon打卡，不過呢棟樓高314米共77層嘅建築，特點是頂層凌空玻璃地板，企喺上面包保腳仔軟呀。

唔好話去現場，314米高睇相都已經有啲驚喇
不過今次Roger推介嘅，其實係大樓內新開嘅酒店，呢間酒店提供155間客房，平均收費約2000港元一晚。而酒店內嘅中菜廳，仲係泰國食家近日慕名幫襯熱點，叉燒姐就最欣賞餐廳嘅肥燶叉燒喇，餐廳仲有以蘋果木燒成；限量提供嘅北京填鴨、 同埋收費3000多銖(約713港元)嘅港式蒸東星斑。雖然收費唔平，不過目前訂位都要等3個月。

叉燒姐至愛就係肥瘦相間嘅燶邊叉燒喇
7號晚一集Roger繼續帶大家搵食， 今次推介嘅係有「香港明星雞飯店」之稱嘅Sui Hen海南雞飯，呢間位於Charoen Krung路嘅老店有超過110年歷史。而講到明星雞飯嘅由來，Roger就話︰「有次帶咗任達華同米雪嚟食過， 話好好食。一傳十、十傳百咁傳開去。」

泰國嘅各式美食真係食極都唔厭
雞飯以泰國頂級茉莉米煮，不過收費只需60銖一份，大大碗足料靚湯又可以另叫。同一條路上仲有一間連續5年獲米芝蓮推介嘅魚粥店， 用料係新鮮鱸魚同石斑。胡慧冲就話食物較接近潮州粥，有別於香港食開較稠嘅粥底。 

冬蔭妹今季一出場就要同Roger共浴喇

一食停唔到口嘅Roger，之後再帶叉燒姐到另一位於Silom路巷仔； 60年歷史嘅Charoen Sang Silom豬腳飯老店，獲米芝蓮推介獨沽一味鹵水豬手，遠遠已經香味四溢， 包保唔會搵唔到。而壓軸登場嘅「冬蔭妹」，一上場仲要即時「犧牲色相」同Roger享受男女共浴浸溫泉，有幾大膽睇過就知。

《冲遊泰國》6號起逢星期一至五晚22:30 J2

泰國人鍾意日本嘅程度絕對唔比香港人低，喺泰國都有唔少充滿日本風情嘅酒店、溫泉同遊園，今集《冲遊泰國》胡慧冲同「冬蔭妹」會介紹泰國充滿日本風情嘅好地方。
冬蔭妹親身示範試溫泉浴。
首先出場嘅係 Mayu BKK Hotel，日式庭園加上榻榻米嘅房間，就連房入面嘅電視都係收看日本電視節目、 酒店膳食亦係日本餐，令大家仿如置身日本一樣。據酒店東主透露，早年因為疫情，吸引咗唔少「哈日」泰國人光顧，所以有 9 成房客都係本地人。如果嫌齋住酒店房唔夠喉，對面有收費溫泉，每 45 分鐘 700 銖(163 港元)，分單人木桶同供兩人用的雙木桶。最貴嘅一款有 VIP 房，仲分成上下兩層，樓上可以做 spa，樓下浸溫泉，機會難得「冬蔭妹」當然要親身示範試用各樣設施。

本集尾站就係去曼谷市周邊，一處名為 Harajuku Thailand 嘅「偽日本」遊園，遊客仲可以換上和服喺園內玩各款機動遊戲，打卡出嚟真係好似喺日本咁。
喺泰國扮去日本。

而17號播出嘅一集，「冬蔭妹」同胡慧冲就會為大家介紹一套喺東南亞好受歡迎嘅泰劇《天生一 對》，之前J2都有配上廣東話播映。由於故事情節牽涉穿越到泰國古代，所以令當地興起一陣復古打扮熱潮，當時出租衫扮「泰古人」市道非常暢旺，就好似去咗日本京都，大家都鍾意租和服行街打卡咁。「冬蔭妹」同胡慧冲各自揀了款心水服飾，着住泰古服到廟宇打卡影相，期間仲吸引到一班西方遊客影埋一份。
兩位扮泰古人。
到夜晚因為要同胡慧冲帶大家去參觀「私竇」嘅關係，所以「叉燒妹」就換上靚現身。呢間位於地牢嘅Abandoned Mansion Bangkok，有駐場歌手、雪茄房、美酒美食等，而且裝潢有品味，想知呢間「私竇」收費貴唔貴？咁就要留意《冲遊泰國》喇！

《冲遊泰國》逢星期一至五 22:30 J2 82 台 播出

胡慧冲同「叉燒妹」帶大家去參觀「私竇」。