蔡一傑台灣宣傳預祝生日 歌迷辦派對主角曬刀功

2月6號係 蔡一傑 56歲生日，早前佢同 草蜢 另外兩位成員蔡一智同蘇志威，到台灣宣傳3月舉行嘅巡迴演唱會台北站，除咗不停現身唔同通告之外，傑仔亦出席當地歌迷為他籌辦嘅生日會，近年經常喺個人頻道教大家煮嘢食嘅佢，又即場傳授入廚秘方大展刀工與眾同樂。

草蜢喺台灣期間馬不停蹄出席活動，亮相唔同平台宣傳，又快閃Busking玩驚喜，唔少歌迷仲曾喺台北街頭野生捕獲佢哋。而壽星仔蔡一傑亦抽空同歌迷聚會，久未見面嘅台灣朋友仲捧出生日蛋糕為佢預祝生日，而蛋糕上嘅「傑仔」赤膊露出結實胸肌同腹肌，大家更即場起哄叫傑仔除衫「驗貨」。

喺全場大合唱生日歌後，傑仔就許願話：「我有三個願望：每個人都身體健康、世界和平、所有演唱會都成功！」歌迷又向愛烹飪嘅傑仔送圍裙做禮物，上面印咗「BaBaBa」字樣，紀念草蜢1997年推出嘅一首國語歌，歌迷仲話有諧音「發發發」嘅好意頭，加上傑仔喜愛下廚，所以希望佢下廚時都會覺得台灣歌迷好似攬住佢一樣，非常有心思。

而生日會重頭戲就係歌迷烹飪大賽，原本擔任評判嘅傑仔，仲手痕忍唔住出手，又向歌迷傳授刀工，示範切魷魚同拍蒜頭。傑仔輪流向各歌迷細心指導，仲親手開爐炮製一道「韭菜花炒鮮魷」呀。