李龍基攜嫩妻出席好友聚會 Chris與羅蘭姐整心手勢融入老公朋友圈

踏入新一年通常會約親朋好友去酒樓飲茶，羅蘭、李龍基及黃允財不時相約聚舊，早前同劉松仁及米雪飲茶，噚日李龍基喺IG動態貼出上月初佢哋搵埋石修、韓馬利「Mary姐」、盧宛茵、杜燕歌、著名監製梅小青及丈夫劉家豪飲茶嘅合照。

相中見前輩級演員均精神奕奕，李龍基出名「寵妻狂」，當日有攜同愛妻Chris Wong一同現身，Chris更同羅蘭姐一齊整心心手勢，早已融入老公嘅朋友圈；而黃允財轉行做中醫師多年，同昔日圈中好友仍保持聯絡，黃允財專長針灸把脈，醉心鑽研中醫，黃允財已開設醫館行醫濟世，有時更免費為老人睇症。