中年好聲音丨吳大強以秘密武器冧暈車婉婉 梁浩銓唱出歉意之歌

人稱Bill哥哥嘅吳大強，喺《中年好聲音》入面越戰越勇，更加被指係儼如「大魔王」嘅級別，嚟緊12號播出嘅一集，呢位大魔王將會出戰第四部曲次回合《導師分組賽！絕境生還戰！》。

第四部曲由星級導師蔡立兒、韋綺姍、彭家麗帶領嘅三組，將分別派出代表出戰次回合嘅「睿智之歌、慘痛悲歌、浪漫愛歌」三輪比拼。次回合最低分嘅一組會被淘汰一人，而兩個回合加埋最低分嘅一組，亦會有一位成員被 Foul！大魔王Bill哥哥就係出戰「睿智之歌」，挑戰周吉佩同梁浩銓，另外出戰「慘痛之歌」嘅選手就有涂家堯、林鉫徫及魏嘉信，而「浪漫愛歌」嘅選手就有彭澤英、支嚳儀同羅金榮。

代表紅組出戰嘅 Bill 哥哥首度 Solo 獻唱《浪子心聲》，佢仲會出動兩大秘密武器嚟為紅組搶分，連主持車婉婉都被 Bill 哥哥「迷暈」，婉婉笑謂：「大強你咁樣唔得，次次都揞啲武器出嚟，啲女仔會死晒㗎喎，我頭先都暈低咗！」 

至於代表綠組出戰嘅梁浩銓，則獻唱天王劉德華嘅《如果有一天》，佢喺演繹呢首歌嘅時候，就忍唔住淚灑舞台，原來首歌對佢嚟講係對父母表達歉意之歌，想知就要留意星期日播出嘅《中年好聲音》。

《中年好聲音》逢星期日 20:30 翡翠台