鋪鋪Poker｜千嬅教一招KO獅子座老公丁生 爆Torres迷《聲夢》想報名參加

今晚播出嘅一集《鋪鋪Poker》有以招牌紫色頭髮亮相節目嘅 楊千嬅 擔任嘉賓，而曾為同門嘅 師兄 劉浩龍 仲身穿紫色衛衣配襯。千嬅今次係應 郭偉亮 邀請擔任嘉賓，佢仲爆原來同Eric同年同月同日生，大家都係典型水瓶座性格，3號嘅生日仲齊齊步入49歲。

而節目一開始，師兄就問千嬅大懲罰最驚會遇到咩物種，千嬅就話︰「蛇蟲鼠蟻係基本驚，有毛滑潺潺、曉郁有生命都驚。」佢又自爆老公 丁子高 出門前叮囑佢︰「佢叫我睇路囉，小心啲出牌。開頭以為佢驚我輸，原來佢係唔想我輸得咁核突。」 

到牌局正式開始，第一鋪先演變成三位女士對決，千嬅憑最後一隻牌，構成同花擊敗Sonya嘅3條7同埋Amber嘅一對A而先下一城。席間Eric提到圈中有唔少獅子座藝人，而在座嘅師兄同 千嬅老公丁生都係最佳例子，Eric話︰「谷德昭都係，佢哋玩牌有一個特點，好少偷雞，開頭死都唔肯講畀我聽點解。後來佢哋解釋我聽，因為獅子座要面，好驚偷完雞衰咗個下， 瘀呀。」

千嬅仲話獅子座有「囉嗦」呢個強項，而水瓶座嘅千嬅，以一招秘技就可以順利KO老公，想學嘢就記得留意今晚嘅《鋪鋪 Poker》喇。

千嬅又講到早前Halloween為囝囝 丁進諾 佈置屋企，因為佢唔止儀式感重，仲喜歡扮鬼扮馬，更遺傳父母鍾意唱歌嘅特質，佢話︰「佢好鍾意唱歌，仲睇晒《聲夢傳奇2》 識晒啲學員名，所以佢識Eric(《聲夢 2》導師之一)，仲叫我問吓點樣參加。我話你唔好言之過早，10歲咋。佢唔知以為係玩game，唔明個壓力喺邊度。」而自稱一直鮮有下廚嘅千嬅，近年已榮升為廚娘， 原因是老公鍾意食之餘，更想可以親手煮餸俾寶貝仔食咁話。