非洲潮什麼｜Christy肯雅親親大自然 探野生動物訪土著部落

梁芷珮 喺《非洲潮什麼》繼續帶大家玩轉肯雅首都內羅比，首站先到訪長頸鹿保育中心餵長頸鹿，而當地人仲話長頸鹿口水有殺菌作用！之後Christy再同大家一齊參觀內羅比國家公園，呢個公園仲係世上唯一一個位處首都嘅野生動物園，所以動物非常接近城市，畫面相當有趣。

而呢個內羅比國家公園最大賣點就係有犀牛出沒，Christy見到犀牛踪影時仲非常緊張：「佢哋真係好大隻，會唔會攻擊我哋架？真係有啲驚，因為真係好近好近我哋！」旅程尾聲Christy又參加咗Coffee tour，除咗大歎靚咖啡，又會體驗製作咖啡豆嘅流程。 

Christy一家之後乘搭內陸機到馬賽馬拉體驗Safari之旅，佢哋仲非常幸運一次過探訪到「非洲五霸」—獅子、大象、水牛、豹同犀牛，佢話： 「導遊話我哋好幸運，因為啲豹平時好鍾意匿埋，見到豹已經好難得，依家佢行嚟行去係更加難得。」之後仲目擊獵豹獵食過程。

而呢次旅程最過癮嘅，莫過於喺遼闊嘅大草原歎早餐，Christy話：「呢個體驗，真係冇嘢可以形容到，淨係得一個字，正！你求其畀杯咖啡我飲，我都非常之開心，我去過咁多地方，今次係最正、最好味嘅早餐。」

至於星期三晚最後一集，Christy帶埋小朋友到馬賽馬拉嘅部落探望原住民，喜歡動物嘅囡囡Kasey跟原住民人學揸羊奶，好動嘅囝囝Duncan就同當地小朋友踢用紙搓成嘅足球。雖然原住民生活好似原始簡單，但就充滿着快樂又無憂。

Christy同原住民交流時仲一度感觸哽咽，佢話：「佢哋唔信我哋係一家人，以為係分開嚟嘅遊客，因為喺佢哋眼中，老公唔會成日陪住佢哋，一啲好簡單嘅嘢都令到佢哋好開心，同佢哋講我係一個三個小朋友嘅媽媽，佢哋真係拍晒手，覺得我哋係好幸福嘅家庭。」到節目尾聲Christy亦有感而發謂：「呢次嘅非洲之旅係非常難得同埋感動，好想再返嚟呀！」

《非洲潮什麼》星期一至三晚22:30 翡翠台