新四十二章｜周嘉洛讚陳豪跳舞有感染力 龔嘉欣呻情人節冇著落

TVB熱播劇《新四十二章》演員陳豪、龔嘉欣、周嘉洛、江嘉敏、鄺潔楹、譚凱琪、糖妹及鄭子誠等，呢日現身商場為劇集造勢，為咗配合情人節主題，大玩表白遊戲，仲向fans派禮物兼合照留念，場面非常熱鬧。

陳豪日前喺劇中大晒舞技成為焦點，首度挑戰街舞，見佢忘情勁舞「技驚四座」，陳豪聞言即大笑，原來跳完舞之後，陳豪有啲疑問：「點會諗埋啲咁嘅嘢？雖然街舞係我強項、hip hop喺我啲血液。」周嘉洛指之後有一場群舞，大家都參與吓，又係由陳豪帶領，周嘉洛稱陳豪跳舞好有感染力。
龔嘉欣睇電視時有笑出嚟，當時真係睇佢足足跳咗２分鐘，上環有好多街坊圍觀，龔嘉欣讚陳豪發揮得好淋漓盡致、好奔放，龔嘉欣稱平時好少NG，就係因為陳豪跳舞太搞笑，所以嘴角「失守」；情人節將至，盛傳有新緋聞嘅龔嘉欣，就話冇著落、未收到緋聞男友松岡哲也邀請，到時可能陪陳凱琳大仔Rafael（鄭承悅）慶祝生日。

陳豪以往情人節係送花同食飯，今年就有啲唔同，本來想撇甩小朋友，陳豪同陳茵媺想離開香港，享受短暫二人世界，怎料被小朋友發現，小朋友投訴冇得去，今年只好一齊慶祝；鄺潔楹喺劇中冇戀愛經歷，但係教江嘉敏追周嘉洛，佢笑言江嘉敏用冧仔三式失敗原因係髮型出事，因為江嘉敏劇中造型好似徐嬌。