新一輯《沖遊泰國》主持 胡慧冲 除咗食之外，亦都繼續為大家介紹唔同有趣好玩地方，好似13號晚，自少就是幪面超人迷嘅Roger，拜訪咗曼谷嘅Atakito’s Shop，呢個泰國動漫迷必到嘅朝聖地，仲連日本KOL都慕名拜訪。

對日本動漫特攝有興趣嘅朋友，去呢間鋪實開心死
店主Mr. X強調店內所賣全部正版正貨，均獲授權生產，而講到鎮店之寶，就是 一件曾用作拍劇嘅「咸蛋超人」戲服，Roger話︰「店主同我講8年前見到有人賣，見到之後二話不說用咗80000銖(約18700港元)買咗喇。」Roger又形容「咸蛋超人」戲服好似一件潛水衣，入面有厚厚一層海棉︰「好大陣膠味，嗰時啲特技演員拍完除衫，啲汗好似倒水咁，真係血汗錢。」

而今晚節目就啱晒大碼肥人喇，Roger會帶大家去一間以肥人為消費對象嘅商場。放眼望衫褲鞋襪 裙，全部服飾都係加加加加大碼貨色，真係幾肥都有。而「叉燒姐」鄺玲玲亦會同Roger帶大家食「豬揼兜」，其實是即係豬頸肉連鎖店，呢間鋪頭原本籍籍無名，到後來居然賣到街知巷聞，背後有咩故事今晚為你揭曉。節目又會介紹一味街頭小食「海左」， 即係蟹肉春卷。去唐人街夜遊的話，附近又有碳爐炒米粉、亦可以幫襯由藥房改裝開到夜晚，賣酒味雪糕嘅特色雪糕店。

Roger又會同玲玲帶大家食勻唔同Street Food

近日喺鑽石山發生兇案之後，當日片段圖片瘋傳，社會對慘劇都高度關注，自稱為香港抽水王嘅 林作 隨即出Post指自己有嫌犯同款跑鞋出售，不過呢次唔少人就認為佢太過火。雖然之後佢已瞬即將相關Post刪除，但係又連日多次出Post指出自己呃Like抽水「沒有任何事情是不應該被用來開玩笑的」，引起網上一片討伐。

事後林作指「堅決不為我的言論道歉」，不過星期日中午，林作任職嘅保險公司，就罕有於允許於社交平台出Post，指有理財顧問就社會悲劇作出不當言論及行為，故已終止合約。

簡短聲明又指公司內有清晰社交媒體指引，故個人言論並不代表保險公司立場。而公司內部亦有消息指，涉及被終止合約者為林作。