ANSONBEAN情人節推冧爆情歌 阿冰任MV女主角Sweet到暈

ANSONBEAN 趁住情人節順應歌迷要求推出冧爆情歌《聰明豆》，除咗親自填寫中嘅Rap詞之外，仲邀請咗「小薯茄」嘅阿冰擔任MV女主角。

原來新歌原定去年聖誕節推出，不過最後就為咗精益求精而延遲到情人節先面世，佢話：「今次邀請咗舒老闆(舒文)幫我度身訂造一首情歌，佢係一個好嚴厲嘅監製，教識咗我好多嘢，原本打算聖誕節推出，不過想再做好啲不斷改進，最終變成2023年第一首派台歌，多謝舒老闆幫手邀請Wyman填詞，我好開心。」

據知錄音時，舒文又傳達填詞人Wyman嘅錄音，幫ANSONBEAN更了解同投入歌詞內容。「佢想我表達嘅感覺唔係好慘、唔開心，而係好似同朋友吐苦水，遇到一個對自己若即若離嘅女仔，希望可以好似歌名咁，食粒聰明豆，解決到呢個煩惱。」而現實生活中原來佢喺英國讀書時曾經遇過類似女仔，當時一樣搵不到方法解決，未能令關係更進一步。

佢又話：「其實呢首唔單只係一首情歌，套用喺人生、工作上都可以，以我自己為例，我性格好『衝』，有陣時錄歌、練舞，覺得用『力』可以解決問題，所以錄《聰明豆》嘅時候，舒老闆不斷叫我聰明啲去諗，點樣可以唱好啲，所以呢首《聰明豆》除咗係情人節送俾豆粉嘅禮物，同時亦提醒我自己，做人要聰明啲。」

ANSONBEAN一直都會積極參與歌曲創作，今次亦首次嘗試為情歌填上rap詞，佢話：「其實我冇信心，但舒老闆覺得music break部分比較靜，認為可以加入rap嘅元素，最後我用咗兩日時間寫咗個內容，但其實唔算係rap，係一篇對話，講出對呢段感情嘅無奈、一種內心嘅讀白。」

而今次MV更邀請咗《1人婚禮》女主角；「小薯茄」嘅阿冰出演，故事由ANSONBEAN邂逅新鄰居阿冰，兩人互有好感，不過當ANSONBEAN鼓起勇氣打算表白時，阿冰就突然人間蒸發。MV中仲有唔少甜蜜溫馨畫面，其中一場戲佢哋齊齊喺窗邊晾衫，兩人耍花槍互打仲唔小心將衣物跌落樓下。

#ANSONBEAN #聰明豆 #舒文 #黃偉文 #MV #阿冰 #填詞