新四十二章丨江嘉敏周嘉洛通宵吊頸現真血痕糖妹親身上陣打到飛起

TVB熱播劇《新四十二章》噚晚劇情圍繞「屍體離奇發現」及「四十二章經」解謎兩大情節，歡喜冤家柯仔（周嘉洛飾）與Mon姐（江嘉敏飾）拍住上放笑彈，除咗上演壁咚及樹熊式死纏，更齊齊化身「Man in Black」深入虎穴進行調查，可惜遭臥龍幫成員活捉兼被吊起；最終危急關頭，曉嵐（糖妹飾）率領施朗（戴耀明飾）及Zoie（鄺潔楹飾）殺到，幫佢哋逃過大難。

江嘉敏呢一身嘅造型，獲讚靚仔有型。
糖妹首度拍打戲，無論姿勢、眼神均相當到位，夠晒殺氣，其中反身翻騰兩周半倒掛金鉤、以及繞「牆」一周兩大招式更係揮灑自如，而且拳拳有力，獲網民激讚相當有型，監製Joe大讚糖妹打得出色，並指佢嗰日所有動作戲全部親身上陣。

周嘉洛同江嘉敏嘅表情都好有喜感。江嘉敏教壞人嘅囝囝做數學功課。
糖妹笑指身手敏捷係因為人短身手會矯捷啲，同埋呢幾年有做Gym，起碼下盤好穩，加上武指喺兩個月嘅訓練，有不斷教佢哋點樣做動作會靚啲，同埋點樣可以保護自己唔好受傷，食吓宵夜又打吓時間好快過，所以糖妹覺得興奮多過辛苦。

本身二人有機會逃走，唔使死！吳瑞庭飾演嘅反派頭目Billy後來變卦，想將佢哋捉入實驗室。

糖妹由細開始恨做「女俠」，透露當收到監製「打女令」即非常開心：「一聽到阿Joe要我做『最矮又最打得嗰個』，我就𦧲飯應。（你唔似第一次拍戲）係呀，因為同一個動作同一日會做好多次㗎嘛。」從糖妹提供嘅拍攝花絮片段中，清楚可見佢每個動作都做得相當投入，現場不斷有人予以Fine Tune，糖妹單係起飛腳踢吳瑞庭，已做咗至少10次以上。

齋睇糖妹嘅表情，都感受到佢每一招都幾咁出盡力。糖妹一出場無論姿勢同眼神都好有氣勢。

江嘉敏與周嘉洛嘅「半天吊」亦拍足一整晚通宵，江嘉敏事後笑指比拍攝「神行百步」輕鬆：「不過因為吊住條頸嗰條係麻繩，所以都有少少血痕。佢哋個個都以為係化妝，咁仲好，成件事好真實。」談到喺劇中與周嘉洛有不少埋身接觸，江嘉敏笑稱由於二人多年前已有合作，同樣玩得，故合作無間、默契十足，江嘉敏稱私下遭嘉洛嫌棄：「同佢合作唯一尷尬係我劇入面剪咗個好短嘅髮型，加上用嚟Gel頭嘅Product都係男仔用嘅，所以我一行埋嘉洛爺身邊，佢就會話好大陣男人味，話自己好似畀男人摸緊咁。」

呢個反身翻騰竟然係親身上陣，好Amazing！糖妹每個動作都做到最好，專業！