黎諾懿爆大仔表演慾太強 唔贊成畀「小春雞」頻密出鏡

黎諾懿呢日出席本地有機食品活動，即場示範煮有機菜式，黎諾懿一向煮嘢食好叻，原來佢都有教兒子「小春雞」黎峰睿下廚，雖然好多人會覺得畀小朋友下廚好危險，不過黎諾懿覺得小朋友應該自己成長，喺「小春雞」3歲嗰年，黎諾懿已教阿仔煮即食麵：「係男仔嚟，我係會畀佢試，阿仔而家埋位係成日炒嘢同煎嘢，好多嘢都會做。」

黎諾懿爆大仔表演慾太強，笑言唔敢帶阿仔到現場，因為阿仔會要求上台及煮嘢，黎諾懿無奈：「佢而家覺得自己嘅廚藝同焦點度都出名過爸爸，佢嚟到要花好多時間唔畀佢上台，跟住又要喺台上介紹我位公子喺台下，所以大仔比較麻煩啲，成日想出鏡，離晒譜！細仔就好啲，不過費事老婆要照顧細仔，大仔又要扭上台。」

黎諾懿亦唔介意同大仔父子檔拍節目，不過要求公司要出糧畀阿仔，暫時佢都希望阿仔係過小朋友生活，學劍擊同游水，黎諾懿始終唔想阿仔成日上鏡。