新歌三度請師妹任女主角 謝高晉拒認情侶檔同霍哥拗手瓜

謝高晉 近日推出新歌《白羊男孩的情書》，日前仲再邀請師妹 何天嵐 (Wren)擔任女主角，而男主角就由微辣網紅 霍哥 擔綱演出喇。

本身係白羊座嘅謝高晉直言：「今次想將一啲其他人對白羊座嘅誤解講出嚟，白羊成日會將悲傷留喺自己心深處，只寄望身邊人開心快樂，處事上仲會用盡200%努力將每件事情做好。就好似比賽一樣，定立左嘅目標就算令自己遍體鱗傷，跪住爬都必定要完成！」

高晉前年同舊年推出嘅歌曲《一對受害人》仲有《謝絕關心》MV，都邀請師妹何天嵐擔任女主角，再加埋新歌《白羊男孩的情書》串連成一個愛情故事，所以今次繼續連戲邀請Wren演情侶。而佢哋又曾喺網劇扮演一對，但係佢就否認要營造情侶檔形象喇。

「好多時候大家見到Wren做我嘅女友，除咗令佢可以習慣到角色之外，都可以令佢慢慢吸收拍攝上要注意的事。情侶檔方面就要睇下觀眾到底喜唔喜歡再作決定。」佢仲坦言同Wren私下似兄妹咁話。

而第三度擔任高晉MV女主角嘅Wren，就話要感激對方照顧自己，仲因為多次合作而培養出好默契，鏡頭基本一take過完成：「大家完全冇尷尬，而且配合度好高，師兄帶住我入戲，非常容易投入。」

至於今次男主角就由 霍哥出演，原來佢同高晉已經認識兩、三年，不過今次係第一次幕前合作。霍哥透露同對方身高、身形都相近，所以有好多共同話題，「我之前透過造型師Daisy問高晉借衫出活動，件藍色長褸唔係講笑，真係型！」

霍哥仲搞笑話：「今次MV拍攝好有趣，題材都好新穎、大膽，大膽係因為竟然喺咁唯美嘅音樂MV中揀我出演，哈哈！如果同佢比，我覺得自己除咗靚仔過佢之外，其他嘢佢都贏晒。」
霍哥仲大讚高晉認真又有想法，非常清楚自己作品方向。