藍組相約飯局睇節目 韋綺姍抱緊處理被淘汰嘅李思林

藍組相約飯局睇節目 韋綺姍抱緊處理被淘汰嘅李思林

TVB歌唱真人騷《中年好聲音》16強之戰,以合唱形式進行,藍組隊員李佳、李思林、支嚳儀、林鉫徫、周吉佩及丁文俊相約歌唱老師韋綺姍食飯睇直播,歡笑聲不斷,相當有愛,

李思林今次揀咗韋綺姍名曲《相逢何必曾相識》與何博文出戰,雖然最終李思林被淘汰,未能晉級,不過李思林可以圓夢跟自己好欣賞嘅韋綺姍老師學唱歌,佢都話無憾,李思林亦覺得唱歌有進步,韋綺姍坦言:「第1次睇《中年好聲音》,我聽到佢唱,嘩!唱成咁嘅,有好多震音,佢啲震音幾『娘』,將啲震音放晒後面唔好聽,我話你要跟足晒咁樣就會好聽啲,佢好聽話好勤力,一個支嚳儀、一個『二家姐』,真係好勤力。」

韋綺姍覺得李思林呢兩次出場嘅表現係抵錫,然後錫咗李思林塊面一啖,韋綺姍大讚另一位學生支嚳儀呢集表現不錯,支嚳儀多謝老師耐心提點,需要時間研究同不斷練習,支嚳儀表示:「其實好感激老師因為我哋『上床』…哈哈!上場!」韋綺姍即忍唔住話支嚳儀啲字發音都要執,藍組因節目結緣變老友 ,韋綺姍做咗導師後,多咗啲仔仔女女陪伴,不知幾開心。

呢集吳大強同顏志恒呢個相差30歲嘅合唱組合有睇頭,李佳夥拍羅啟豪呢個組合亦獲得評判大讚,羅啟豪更獲選呢集MVP,佢出戰前因唔舒服一直擔心影響表現,拎到呢個獎,佢都覺得喜出望外。

此外,總經理曾志偉亦有嚟探班,邊睇錄影邊展露滿意嘅笑容,見證梁浩銓與父母世紀和解呢一幕,志偉都眼泛淚光,梁浩銓上集親手寫道歉信兼送上錄影入場券求父母原諒,最終得償所願,獲父母原諒兼放下芥蒂現身錄影現場送上支持,佢都忍唔住爆喊,梁浩銓出賽前有問過胞弟知唔知父母會唔會出現,後來佢知父母到現場,心情好緊張,希望日後關係越來越好。

李泇霖推出首支單曲 獲《中年好聲音》戰友力撐支持

《中聲1》參賽者李泇霖舉行發布會,宣布推出首支個人單曲,獲前輩文佩玲、莫鎮賢同《中聲1》戰友吳大強(Bill哥哥)、丁文俊同支嚳儀、魏嘉信同柳冕等人支持,眼見家人朋友支持,泇霖都覺得非常開心,好友顏志恒(Benson)同何博文仲上台獻唱。

眼見一眾《中聲1》戰友撐場,泇霖都話非常感動,尤其原本喺外地旅行嘅Bill哥哥,都趕得切返嚟見證重要時刻,Bill哥哥都話能夠見證呢一刻都好開心,聽到泇霖演繹之後更加感動,佢仲話要再翻聽。丁文俊話首歌好有意思,能夠一路堅持音樂路到出歌,係好值得支持。

泇霖就話首歌係送畀媽咪嘅禮物,而活動當日更加係佢媽咪嘅正日生日,所以覺得成件事好感恩。佢話出歌唔容易,尤其係到佢呢個年紀,但只要堅持都可以做到。

見證住泇霖出歌既重要時刻,身為佢好友既一班《中聲1》戰友都好戥佢開心,尤其係識於微時既Benson,佢話當初係參加泇霖舉辦嘅民間歌唱比賽而認識,佢知道呢首歌其實係三、四年前已經有意推出,最終等到而家先面世。魏嘉信都話自己想講嘅嘢畀Benson講晒,不過唔同之處,係佢冇參加過泇霖搞嘅歌唱比賽。講到幾時出新歌,支嚳儀就話新歌MV已經做緊後期,Benson亦有幸先睹為快,佢都大讚拍得好好。

 相關推薦

熱門搜尋