高海寧近日接受TVB娛樂新聞台《星光路上》主持潘盈慧訪問，坦言細個志願係想做幼稚園老師，不過媽咪一直想阿女參與港姐，當時爸爸覺得阿女肯讀書，就唔係太想阿女去選美，直至2008年香港小姐競選有得去加勒比海，爸爸開綠燈畀高海寧參賽，安慰阿女若果唔得就當去旅行。

高海寧回想頒獎當晚有好多女仔喊，但高海寧則鬆一口氣，因為選美時不時要泳衣示人，當時承受好大壓力，只希望件事快啲完結，佢坦言當時情緒唔係幾好，不停喺屋企食嘢，一個月肥咗30磅，高海寧曾想過自己唔啱做呢行，2010年被公司安排去南非做世界盃主持，佢喺呢次成功克服對鏡頭嘅恐懼，慢慢對自己恢復信心，高海寧入行以來機會不絕，有得拍劇、主持飲食節目及旅遊節目，佢最難忘拍《天梯》當時要調侃黃德斌，高海寧嚇到手震，直到拍《不懂撒嬌的人》，高海寧先學識挑逗對方喺眼神、語氣同手指都要做戲，要林文龍教佢點演先知當中嘅技巧，獲益良多！

高海寧好開心一直有爸爸陪住同照顧，咁多年都做高海寧最強後盾，爸爸亦會睇佢每一齣劇，又會睇劇本，到劇集播出街又會同阿女分析角色，對於高海寧每一件事，爸爸都好上心，高海寧曾笑言將來搵唔到一個咁嘅男人點算，爸爸一直提佢擇偶唔好太高要求，高海寧笑稱爸爸更希望阿女結婚：「阿媽覺得女人唔結婚唔緊要，反而老竇係覺得最緊要有一個錫我嘅男人。」高海寧今次去泰國拍《吃貨橫掃曼谷》，呢次拍攝又食又玩，佢覺得好開心，呢幾年高海寧學習跟自己嘅心靈相處，佢好希望之後拍一啲關於情緒病題材嘅電影或劇集。

喺劇集《廉政狙擊》內扮演慈母嘅黎燕珊，淋漓盡至嘅演技整喊唔少觀眾。現實中嘅珊姐，曾經因為愛情而放棄事業，淡出幕前變成相夫教子嘅人妻，可惜婚姻只係維繫咗8年。經歷過一段唔完滿嘅婚姻，珊姐對愛情嘅睇法有冇轉變？曾經喺選美冠軍嘅佢，而家經常要演化老妝、甚至喺鏡頭前要素顏示人，珊姐又係點樣調節自己心態？

呢日珊姐接受節目《星光路上》嘅訪問，同主持 潘盈慧 娓娓道出自己嘅故事，當中佢仲分享失婚後，喺零積蓄下從頭開始嘅經歷。