廉政狙擊｜王浩信棚架追江榮暉拍足全日 舊樓倒塌畫面塌搜救專隊協助

大量星級演員參與演出嘅《廉政狙擊》20號正式首播，首集甫開場就已經有連串精彩大場面，好似大廈倒塌、飛車同棚架追逐等鏡頭， 其中棚架追逐同大廈倒塌花絮片早前相繼喺網上曝光。

要營造逼真嘅大廈倒塌畫面，整個舊樓睡房場景由人手喺攝影廠搭建，而增強大廈倒塌時搖晃嘅震撼感同細緻度，場景中嘅衣服同雜物都由工作人員以繩索操控，每個細節都花盡心思。而倒塌後嘅地面廢墟，劇組仲收集真‧建築廢料，花咗足足兩星期模擬搭建而成，拍攝時亦邀請消防處坍塌搜救專隊喺現場進行指揮，認真之餘同時注重安全。

另一場刺激嘅棚架追逐戰，就由飾演O記高級督察韋Sir嘅 王浩信 同埋首單元當中嘅大反派 江榮暉 親身上陣。佢哋先喺單位內飛躍出窗外，再喺狹窄棚架中穿梭、追逐同埋身肉搏，其間仲要喺近乎倒塌嘅棚架中扭打兼講對白，絕對係體力、演技同記性三重考驗。

兩名演員喺呢場場面大部分時間親身上陣，劇組亦安排替身在場以備不時之需，正式埋位前亦仔細講解走位同注意事項，王浩信正式「上架」前又冋武指鑽研每個動作，正式拍攝期間亦冋時兼顧拍檔江榮暉嘅安全，相當專業。

花絮片所見，王浩信體能Fit到爆，除咗擒高爬低冇難度，手上麒麟臂更加相當引人注目。雖！整個場面播出時只得半分鐘，不過Vincent受訪時就話原來足足拍咗一日：「由朝早拍到夜晚收太陽，最難忘係我哋封咗成條街去做呢件事，無論資源同街坊都配合得好好，最後冧棚嘅效果都要多謝動作指導設計得非常之好。」

要喺咁狹窄嘅空間追逐同打鬥，Vincent就話一啲都唔簡單喇：「我覺得要畀驚喜觀眾，梗係要向高難度挑戰啦，其實我自己幾鍾意拍動作戲，所以呢場戲我拍得好開心。」十隻手指黐滿膠布嘅佢又話：「始終竹棚多機會『摻』刺，所以黐膠布避免刮傷。」

除咗以大場面震撼觀眾之外，《廉政》首集劇情亦已立即進入戲肉，由廉政公署首席調查主任章Sir（ 譚俊彥 飾）率領嘅團隊，好快就開始首個個案「海關關員受賄案」調查工作，調查期間除咗王浩信冋江榮暉發生激烈衝突冋上演追逐戰外，涉案人物之一嘅謝宏風（白彪 飾）亦中槍身亡，而小時候喺塌樓意外中失散嘅洛子峰（黃宗澤 飾）、方家晴（ 黃智雯 飾）同韋 Sir亦因調查關係再次重遇，由於宏風係家晴嘅養父兼師傅， 二人感情相當要好，所以宏風之死對家晴造成極大打擊。

《廉政狙擊》星期一至五晚21:30 翡翠台