StarTalk丨姜皓文分享與小演員合作心得 讚「珠女」王詩雅有潛質

StarTalk丨姜皓文分享與小演員合作心得 讚「珠女」王詩雅有潛質

姜皓文日前上TVB娛樂新聞台節目《StarTalk》接受主播鍾煒喬訪問,暢談新片《殘影空間》拍攝點滴,姜皓文坦言每逢開工好少食嘢,準備保持狀態同身形fit啲,佢今次喺新片飾演老差骨,後來畀心理醫生走入內心,得知佢同阿女嘅秘密,呢齣電影主要體驗人性真實一面,譬如人性太自私、主觀嘅陰暗面,反映一個人自私同主觀,令件事發生到不堪設想。

姜皓文坦言今次拍攝班底好順暢,整個過程得心應手,首次與鄧麗欣合作,姜皓文指鄧麗欣有不少沉重戲份,讚對手演呢個角色呈現得好立體,姜皓文喺戲中最難忘父女故事,憶起兒時成長經歷,自己喺兒童院長大,連生父都未見過,呢個故事係幾觸動心靈。

姜皓文稱今次由「珠女」王詩雅飾演佢阿女豆豆,繼《五個小孩的校長》再次合作,佢讚王詩雅演得好:「嗰時拍《五個小孩的校長》已經覺得佢好標緻,好有潛質,好多時跟小朋友做戲覺得對方好『老人精』,但佢又有嗰份天真喺度,但佢又做到你想要嘅嘢。」姜皓文覺得同小朋友演戲唔辛苦,一定要投其所好,唔好做大哥哥、唔好呃佢,自然去享受箇中樂趣。

StarTalk一氣呵成版|李英愛曾夢想參演《無間道》 氣質女神自爆私下係虎媽

當年因為《大長今》而紅遍全球;被韓國Fans冠以「氧氣女神」稱號嘅女星 李英愛 ,早前應邀來港出席亞洲電影大獎頒獎禮,亦接受咗 王鎮泉 嘅《StarTalk》專訪,仲記得10年前來港時,亦係由泉叔同佢做專訪。

早喺電影《JSA》扮演軍官同 李秉憲 宋康昊 合作演出已為香港觀眾眼前一亮嘅李英愛,雖然結婚誕下一子一女後減少幕前工作,不過依舊氣質動人非常優雅。已經近5年未有訪港嘅佢,可惜因為仍有拍攝工作而未能久留,仲話非常渴望可以一家人一齊品嘗地道點心呀。

獲頒卓越亞洲電影人大獎嘅愛姐,指獲頒咁有份量嘅獎絕對係始料不及,對亞洲各地觀眾依然記得自己非常高興,自己同老公都非常開心,仲爆老公因為咁而周圍曬命,非常可愛呀。

難得來港參與電影屆盛事,同大量各界電影人見面,而愛姐原來就曾幻想可以參與演出《無間道》,同 梁朝偉 仲有少女時代曾合作拍攝廣告嘅 劉德華 再次合作。愛姐仲認為兩位男神多年來都係唔少人嘅偶像,亦係自己繼續學習同努力嘅學習對像咁話。

外傳愛姐將再次演出新劇《醫女大長今》,而佢為全世界所知亦係因為長今一角,愛姐就話覺得《大長今》唔止係一部電視劇,而更似代表韓國嘅一位外交官一樣,向世界各地宣揚韓國傳統,自己有份擔綱演出係人生中非常幸運嘅一件事,相信唔會再有更好嘅機會出現喺生命之中呀。

至於係咪會參與新劇演出,愛姐就未置可否亦未正面回應,只係話希望可以等待好嘅作品同角色出現喇。作為兩位青春期少年嘅媽媽,愛姐亦坦言婚後一度將重心放喺家庭,不過隨住小朋友成長,目前就可以再專心為演戲而投入工作喇。

講到家庭,愛姐雖然一直俾人非常溫柔嫻淑嘅感覺,但係一提到照顧龍鳳胎子女,亦不禁嘆一口氣話非常辛苦,仲笑言要借開工逃避一下,更指自己同一般媽媽一樣會發嬲噴火,非常真性情。

年逾53嘅佢又同大家分享自己嘅保養心得,佢認為對飲食有嚴格要求同保持正面係長保年青健康嘅重要手法呀。

 相關推薦

熱門搜尋