下月就舉行入行以來首個紅館個唱嘅「唱作王子」 馮允謙 ,為咗隆重其事早前特別製作演唱會主題曲《入場人士注意》,亦係佢2023年首支派台歌。Jay喺MV化身開心博士研製快樂菌感染全世界,散播正能量拯救唔開心嘅人,而MV尾聲Jay仲送上驚喜。
新歌《入場人士注意》特別為今次紅館演唱會度身製作,Jay更參與新歌嘅曲、詞同監製,又邀請咗唔少音樂人合力打造演唱會主題曲。而拍攝MV當日,又安排咗20位喪屍妝扮嘅演員參與,佢哋由酒吧場景、滾軸溜冰場、實驗室追到街頭,Jay飾演嘅發明家就以「快樂菌」沿途散播正能量,Jay話:「今次MV唔使跳舞,但有一組動作喺MV裏面不停做。我希望到時演唱會上,台下觀眾都可以同我一齊做,一齊投入呢首歌,感染快樂氣氛。」
佢話: 「今次MV故事同演唱會主旨好相似,見到世界變到好壞,啲人唔開心,所以發明快樂病毒,感染所有人。我希望入嚟睇演唱會嘅觀眾都感染到,好投入我個騷,變得更快樂!」
Jay喺拍攝現場亦似足MV當中發明家一樣,同飾演喪屍嘅年輕人打成一片,雖然拍攝足足十幾個鐘頭,佢哋又熱又攰不過依然有講有笑。MV最後Jay更向導演自薦以喪屍妝壓軸亮相。
演唱會舉行在即,Jay心情既興奮和緊張,早前佢就放假返加拿大探望父母親友,共聚天倫後充滿能量,佢話:「今次只係休息咗幾日,我當然好想再放長啲假期,真係太耐無放長假。不過我都好感恩,開騷前竟然有假放喎,好開心。休息完返嚟,個腦好清𥇦,工作更加投入,我又再充滿力量!」