StarTalk丨唔信可以同Sammi演夫妻 陸駿光自言擔心變尹天仇

StarTalk丨唔信可以同Sammi演夫妻 陸駿光自言擔心變尹天仇

以寄養家庭為題材,探討親情、愛情及傷痛嘅電影《流水落花》,早前喺第29屆香港電影評論學會大獎入面,奪得「最佳女演員」同「推薦電影」,呢日主演嘅 鄭秀文 同 陸駿光 ,就嚟到《StarTalk》同 王鎮泉 分享拍呢齣電影嘅經歷。

好多人都話拍戲最怕與小朋友同動物做對手戲,但喺《流》片入面嘅小演員,似乎表現得相當專業,甚少扭計唔合作,對此Sammi就話呢幾位小演員都係對演戲有熱誠,加上導演透過鏡頭捕捉到佢哋好有真摯純真嘅一面,亦係令到整部戲好睇嘅一個重要因素。

戲中角色又食煙,講嘢又粗聲粗氣,對小朋友絕對唔算溫柔,睇劇本應該都唔會覺得呢個係討觀眾喜愛嘅角色,但係Sammi偏偏話佢就係鍾意呢個角色夠立體:「反而我覺得最感動嘅係,有時做咗一啲你唔覺得係咩好偉大嘅事,但喺旁人眼中會覺得『你有呢個大愛可以做呢樣嘢』但係做嗰個人又唔自覺做緊一樣好大愛嘅事,呢樣我會覺得相對更加感動。」而Sammi所講嘅感動,正正喺佢戲中角色所做嘅事 — 當寄養家庭嘅父母。

最初知道要同Sammi演夫妻,陸駿光話根本唔相信呢件事係真嘅,佢仲話怕自己好似「尹天仇」咁,一日未簽約,個劇本都有機會畀人拎走,不過Sammi就打斷陸駿光嘅恐懼,仲話因為部戲嘅選角,係自己有份參予,仲話自己覺得陸駿光好適合呢個角色,仲可以100%演繹到呢個角色嘅味道呀!

電影泉攻略丨《哥斯拉X金剛:新帝國》演員分享拍攝花絮 《功夫熊貓4》故事總監分享創作靈感

王鎮泉 Jeoffrey  每星期為你提供最熱辣電影資訊,中外猛片專訪花絮上映時間全部集齊。「電影泉攻略」每周四買定爆谷陪你睇新戲。 

新片《哥斯拉X金剛:新帝國》,哥斯拉同金剛呢個怪獸組合拍到第五集,佢哋唔再係死對頭,而係要聯手對抗未知嘅神秘強敵,泉叔亦同戲中演員Dan Stevens、Brian Tyree Henry、Rebecca Hall、Kaylee Hottle,以及導演Adam Wingard做咗專訪,分享拍攝呢套動作大片嘅幕後甘苦。 

本周新片有法國電影《分身走錯佬》,以及老少咸宜嘅新一集系列動畫《功夫熊貓4》,而本集嘅故事總監係土生土長嘅香港人Kelvin Tsang,除咗分享自己喺電影中負責嘅工作,仲同大家分享影響自己最深嘅港產片,佢透露自己受香港電影影響好深,所以對動作設計好有興趣,今次亦擺咗好多相關元素入電影中,希望大家會鍾意。 

過去一星期嘅票房龍虎榜方面,內地女星賈玲自導自演嘅《熱辣滾燙》,票房好似片名咁熱辣,而第二位係由兩代捉鬼敢死隊合力炮製嘅《捉鬼敢死隊:冰封魅來》,而票房冠軍就繼續係《沙丘瀚戰:第二章》。

 相關推薦

熱門搜尋