廉政狙擊｜陳楨怡被高鈞賢捆綁蹂躪 黃智雯再展歌喉眼前一亮

27號晚播出嘅一集《廉政狙擊》當中 王浩信 飾演嘅韋Sir帶領O記手下潛入雍華盛薈嘅閉幕禮派對，調查酒店賣淫案。韋Sir受線人臨終前所託照顧女兒莊慕雪( 陳楨怡 飾），可惜佢亦因誤信損友捲入其中。

當雪雪得悉自己身陷險境後，隨即向韋sir發短訊求救，韋sir根據線索鎖定目標酒店，但就遲遲未能尋獲雪雪，好在千鈞一髮間靠門縫下光源尋獲雪雪，可惜佢已慘遭狼爪，送往醫院後更受驚至不似人形，仲因為留有陰影情緒失控崩潰。而虐待雪雪嘅卓日升( 高鈞賢 飾)，就因有人通風報訊而及時離開現場。

Celina遭Matthew性虐待極盡視覺震撼，網上引發極大迴響，Celina受訪時透露，拍攝過程相當專業，劇組仲邀請「捆綁專家」到場協助拍攝：「其實每個結喺邊個位都好講究，我個姿勢係對手綁喺後面然後要單腳企，再成個人凌空吊喺支架上面，包括頭髮都要綁埋喺繩上面，變相個頭其實郁唔到。身上面啲繩因為好緊，所以基本上郁唔到，只能間中 Hold住落地面休息，綁完皮膚係會有好深嘅麻繩印。導演佢好好， 每隔十五分鐘都會問我情況。」

被凌空吊足成個鐘頭嘅Celina，仲話今次拍攝最考驗平衡力：「因為雙手被綁住咗，又要離地吊起，重心好易向前傾，咁就好易會扯到啲頭髮。」為咗將角色驚恐狀態細緻演繹，Celina之前做咗唔少功課：「睇咗好多恐怖片同虐打題材戲攞靈感，睇吓人哋點樣表達好驚嘅情緒。同埋要熟讀劇本，我喺屋企基本上長時間拎住劇本，因為現場會緊張、會扣分，所以要好熟對白。」

而首次拍劇就同視帝王浩信對戲，Celina就話非常緊張，而了解角色後仲感到壓力：「因為我之前冇拍劇經驗，角色又有難度，因為佢有好多情緒，又特別多喊戲，我本身又唔係 咁易喊嘅人。」

Matthew則透露飾演嘅二世祖性格有缺憾又「有啲衰」，但其實單純又易呃，仲渴望得到父親認同。當知道有SM場口時仲唔知點處理：「接咗角色就要完全投入，事前都會就場口同對手做溝通，嗰晚Celina好辛苦， 因為綁住咗成晚，又要通宵咁拍。其實我一直都想做啲自己未接觸過嘅角色，今次另一個特別嘅地方，係終於第一次同吳卓羲合作拍劇。」劇集早前喺內地播出後，Matthew嘅角色被封「傻白甜」，佢就笑言：「我都有設計過啲造型，希望靚仔啲，始終香港先生嚟架嘛，哈哈。」

除咗演員演技之外，四位主角黃宗澤 吳卓羲 王浩信 同 黃智雯 之間嘅友情亦十分入屋，佢哋嘅友誼之歌《友共情》亦引起唔少迴響，噚晚Mandy更再下一城喺劇中街頭busking，个深情演繹譚嘉儀嘅《Can You Hear》，聲線甜美仲充滿感情。一直鍾意唱歌，但數年前公開獻唱後被批評唱功差嘅Mandy，事後曾跟單立文同胡蓓蔚夫婦學唱歌，今次 喺《廉政》中一展歌喉即獲好評。而Mandy喺劇中將周旋喺吳卓羲同黃宗澤之間，芳心爭奪戰仲開始白熱化。

《廉政狙擊》星期一至五晚21:30 翡翠台