新四十二章丨尋寶「失手」新亡魂誰屬 鄺潔楹拍「七彩奪命沙」幫陳豪撥鼻毛

新四十二章丨尋寶「失手」新亡魂誰屬 鄺潔楹拍「七彩奪命沙」幫陳豪撥鼻毛

由陳維冠(Joe)監製、鄭成武編審嘅《新四十二章》星期四就大結局,劇情越嚟越緊張,謎底逐步揭開,噚晚(28號)呢集章經(陳豪飾)與一算(鄭子誠飾)率領螢嬌(龔嘉欣飾)、Mon姐(江嘉敏飾)及Zoie(鄺潔楹飾)等正式展開尋寶之旅,過程緊張刺激又搞笑。


原來開寶藏嘅鎖匙,真係暗藏喺古琴入面。
原來都叔(鄭家生飾)與Nasa(糖妹飾)決鬥前,將真古琴寄咗畀給阿Mon,眾人最終發現藏在古琴中嘅「積木」可變成「立體鎖匙」,成功打開寶藏之門。可惜甫進內即要面對重重機關考驗,噚晚尤以天降「七彩奪命沙」最為精彩,眾人需要喺遭沙活埋之前想出彩沙與頭上銅盤內圖案嘅關鏈,就在千鈞一髮,阿嬌突破盲腸講出答案……

解謎過程偶有甩碌搞Gag,既緊張又好笑。眾人最終發現藏在古琴中的「積木」可變成「立體鎖匙」

原來要拍攝呢個「七彩沙」機關並唔容易,由「尋沙」開始已難關重重,監製Joe受訪時透露:「度橋嘅時候係覺得開心,因為涉及解謎、機關,希望觀眾睇嗰陣可以玩埋一份,有份新鮮感喺度。但到真係執行時係頭痛嘅,淨係啲七彩沙已經搵咗好耐,最後要喺第二度運過嚟。」Joe又指由於沙堆有一定重量,為保障演員拍攝安全,劇組特地搭建一個大型支架撐住各人,並為各演員做定頸套以防有沙漏入身體,以減輕演員承重量。

寶藏入面勁多金銀珠寶,場面好壯觀。

有份參與相關場口拍攝的Judy,憶述當日拍攝難處謂:「雖然有啲小工具去幫輕我哋承受沙嘅重量,但個身點都入咗一半沙,所以我哋每個人拍完返去沖涼時,有唔同顏色嘅沙喺個身度。我算好少少,因為我比較細粒,所以被安排騎喺子誠嘅膊頭度。」


就在千鈞一髮,阿嬌突破盲腸講出答案……
如果唔解開銅盤同七彩沙嘅關鏈,就會畀啲七彩沙活埋。

啲沙灑落嚟時,班演員仲要係咁講對白,相信都食咗唔少沙。

Judy續指自己係所有演員中唯一雙手活動自如嘅人,因而成為陳豪專屬「鼻毛修正員」:「拍到差唔多尾聲,大家都已經畀沙堆到上頸時,突然close up話見到阿Mo(陳豪)條鼻毛突咗出嚟,因為其他演員對手都喺沙入面,淨係得我對手自由;但因為我同阿Mo都有段距離,變咗我要跨過啲沙、再伸長隻手去掂阿Mo個鼻。我隻手又唔係特別長喎,我又唔係好知條鼻毛喺邊,搞到我係咁喺阿Mo個鼻度撩嚟撩去,但阿Mo咁都冇嬲,好有氣量。」


呢個場景花咗唔少人力物力,落足心機拍。陳豪搞到眼鏡起沙,相當有趣。

陳豪個樣勁搞笑,佢仲要拍到鼻毛外露都自己冇手搞,陰公豬。

噚晚及今晚集數出現嘅所有機關,都係工作人員喺廠景以人手搭建,有啲更係「真機關」,相關場口拍攝時間更接近一星期。Judy與子誠便有幸成為其中一個「真機關」用家,Judy憶述謂:「工作人員事先有測試過個機關係咪安全,我哋跌落去個位仲有軟墊添,但可能試嗰個人同我重量唔同,我跌落窿時直頭係飛咗出去咁滯,淨係見到我對腳。」

Judy話今晚有個場口,爭啲真係壓扁鄭子誠,想知何解?

Judy感激阿Joe為其安全著想:「導演有話想再嚟多Take,因為我對腳太搞笑,但阿Joe為咗安全,就阻止導演話:『剪得埋架喇』,真係好多謝佢。同埋好彩有師傅教過我哋有咩意外第一時間要lock住條頸,所以係冇事嘅。」 

糖妹嘅爛臉妝好似又進化咗。

今晚(3月1日)呢集將再更多新奇好玩又意想不到嘅機關曝光,尋寶難度亦會升級,謎題涉及文學、功夫及邏輯推理等,解謎過程似足玩「機關版密室逃脫」。今晚將再有一名重要角色喺尋寶期間「失手」身亡;另外預告所見,Nasa(糖妹飾)以柯仔(周嘉洛飾)要脅阿Mon,更將柯仔打到成臉血……到底最新亡魂誰屬?Nasa又有咩最新詭計?眾人能否尋獲大寶丹?密切留意今晚播出一集。

網民競猜糖妹同譚凱琪邊個先係終極Big Boss,大部份人都投糖妹。

預告入面,糖妹殺上圓圓(馬海倫飾)屋企以柯仔要脅阿Mon。Nasa以柯仔要脅阿Mon,更將柯仔打到成臉血

《新四十二章》本周一至四晚八點半翡翠台播映結局周

陳豪羅子溢各自攜妻澳門街頭狂放閃 劉嘉玲係幕後軍師?!

近排澳門市民同遊客頻頻野生捕獲明星蹤影,其中有網民影到楊茜堯同羅子溢喺澳門街頭浪漫咀嘴,原來兩人正喺當地拍攝劉嘉玲主持嘅內地真人騷《嘉人自友約》,有網民拍到嘉玲姐、楊茜堯同羅子溢去澳門手信街揀美食。

楊茜堯同羅子溢去澳門手信街揀美食。

有網民喺早兩日喺澳門著名咖啡廳捕獲另一對恩愛CP陳豪及陳茵媺,而嘉玲姐都喺店內,呢位網友大讚女神嘉玲姐好有氣質,網民側拍亦見陳氏夫婦有深情攬攬嘅環節,相信嘉玲喺節目中為兩對恩愛夫妻安排咗一場浪漫之旅。

澳門著名咖啡廳捕獲另一對恩愛CP陳豪及陳茵媺。

其實嘉玲早於2月嗰陣有透露節目即將開拍,估唔到拍攝進度咁快,早前網民分別喺唔同地方捕獲到嘉玲孖佘詩曼、朱茵、吳君如等拍攝節目,根據節目海報公布嘉玲亦請到眾多好友李若彤、葉童、鄭裕玲、楊采妮、莫文蔚等作客節目,相信陳氏同羅氏CP應該係隱藏特別嘉賓。
吳君如同劉嘉玲於1983年考入第12期無綫電視藝員訓練班,二人相識多年。劉嘉玲與朱茵因拍攝2004年電影《性感都市》相識,兩人這次在節目《嘉人自友約》暢談自己嘅另一半。劉嘉玲近日主持節目《嘉人自友約》,邀請佘詩曼去西貢揀海鮮。影后劉嘉玲主持的綜藝節目《嘉人自友約》播出後,引起不少關注。

 相關推薦

熱門搜尋