隱形戰隊丨陳山聰從影以來最大隻嘅一次 陳展鵬為馬國明甘願做奸角

即將播出嘅劇集《隱形戰隊》，以警隊入面嘅反恐特勤隊(CTRU)同神秘部隊—隱形任務戰略部隊(POTT)點樣攜手協力偵破多宗大型案件為故事骨幹。

據知為打造真實感同加強視覺震撼度，唔少場面都係荷槍實彈。而首次扮演特種部隊嘅陳山聰，坦言接拍《隱形》對佢嚟講有兩大挑戰：「特種部隊戲我係第一次演，仲要係反恐，無論造型、身形要求都嚴格好多，包括揸槍。 今次揸槍都得到好多方面嘅指導，包括武指同專業人士，同埋因為多真槍，嗰吓槍聲係好猛烈，同真係會有火花，變咗好容易眨眼。Jazz成日提我哋唔好眨眼，我都算係眨得幾多嗰位。出街時你哋見到我哋冇乜點眨，係因為Jazz下咗好多苦功去剪接。」

之前喺預告片入面嘅「一人搶兩槍」神技，令唔少觀眾嘆為觀止，山聰話係自己事前花咗兩個月時間去練習嘅成果，而除咗苦練槍法外，山聰又花咗三個月時間去健身鍛煉，佢笑言自己係有史以嚟最大隻嘅一次。劇中飾演 CTRU Commander，山聰笑指自己喺屋企亦都係Commander：「我呢個阿頭日日都喺屋企落 order，因為係得我嗌得Jaco(陳山聰兒子)聽，所以現實生活我爸爸呢個角色都係 Commander嚟。」

飾演奸角嘅陳展鵬，透露最開心係相隔12年後以「身份互換」形式再同馬國明合作：「我好記得我喺無綫第一套做男主角嘅劇係《真相》，當年馬國明喺最尾嗰幾集做反派，我同佢都friend，會一齊踢波又剩，當年好多謝佢支持我客串做反派，嗰時我已經講，希望將來有套劇馬明做主角時，我又可以做返反派，客串又好主位又好，呢個係我其中一個喺 TVB 最大心願。」講到相隔多年再演奸角，陳展鵬就話最希望係令觀眾覺得有新鮮感，至於自己做咩角色都冇所謂。

《隱形戰隊》3月6日起逢星期一至五 20:30 翡翠台