林宥嘉4月舉行3場紅館演唱會 場內勿用發光應援物配合主題

等待近4年，林宥嘉終於宣佈「 idol 世界巡迴演唱會香港站」啟航， 將於2023年4月28至30號於紅館，演出3場，於3月13至15日優先訂票，消息一出，令歌迷萬分雀躍，開始緊張如何撲飛。

林宥嘉剛完成多場美加及正喺歐洲巡演，以2019年idol演唱會作延續，轉化昇華到用「愛」為新概念，據知好多進場歌迷都被延續篇所感動，邊睇邊喊好幾次，填補咗歌迷心的黑洞，永留美好回憶。 啟動前，林宥嘉主動向歌迷宣佈今次概念會以「Love is bigger, even than black holes」為題，林宥嘉解釋唯有愛能滿溢出黑洞：「我或許質疑自己，我或許需要更多答案來填補虛空，愛比這世上一切你我所能想到的更巨大。」

林宥嘉希望呢個演出可以令台上台下嘅每一位，從開始期待緊張，到每一場結束，歌迷將感到「心是滿的」，佢又貼心提醒大家，為咗每位觀眾可共同體驗演唱會嘅概念及貼近最好觀賞，觀眾演唱會時唔好使用會發光嘅應援物品、例如螢光棒、發光燈牌，盡量保持全黑。

林宥嘉將喺4月舉行嘅香港站加入新概念，新增收錄喺第6張專輯嘅新歌。美加及歐洲世界巡演，林宥嘉冇帶屋企人同行，老婆小孩要暫時忍受分開的嘅思念，不過去年10月佢去新加坡音樂節開唱，就有帶家人同行，更形容新加坡呢次演出係「從困難重重變幸福爆棚」，因為那次佢從一落地就嚴重過敏，不只鼻塞、流鼻水、打噴嚏，甚至連說話都有啲吃力，一度擔心現場演出嘅身體狀況。幸好演出時回復正常，唱出超水準。 

旅途當中，佢跟老婆一起買到「對戒」，讓佢覺得幸福滿滿，原來佢同老婆Kiki買咗一副對戒，多年前佢唔小心整唔見咗，好想買回結果尋遍台北都搵唔到，結果此行喺新加坡行街時搵到。

林宥嘉喺溫哥華演出，手上戴著從新加坡買到嘅幸運戒指：「圖為我和我太太新買的對戒，我和我太太的第一隻對戒，我不小心弄丟了，雖然我買不到當初一模一樣的戒指，但總之終於又有對戒可以戴，而且我覺得很搭配巡演的衣服！」