最近張學友相隔8年再推出國語單曲《又十年》，之前佢已經講過首歌猶如佢人生嘅寫照，呢日佢拍片解說呢首歌，學友話：「歌詞中所寫的事會令我想起從前，比如以前會喝酒、會約朋友聚會，現在少了。以前看不開或解決不到的問題，現在都變得沒甚麼大不了。」

對於歌詞入面提到「那些轟轟烈烈讓人懷念已經跟我没有關聯」，學友亦相當有感觸，佢仲話轟轟烈烈係年青時，先會有嗰種不顧後果嘅任性，佢話：「如今回首過往會有種無法挽留的無力感，面對與自己已經無關的不捨時，還是會有點難過。」

雖然唱到眼泛淚光，但學友唔認為首歌曲係太沉重，只係提醒大家要珍惜時間，要抱住「好好咁過、好好地做」嘅心態，因為年青時總覺得時間過得好慢，唔會理解同時間競賽嘅道理，但當年紀漸長先知道時間係無情嘅，就好似歌詞入面所寫嘅「時間它殘忍起來毫無道理可言」咁，學友亦感慨咁話：「當時間過得越快，你的時間就越少，這是大家都要面對的事實，無限的時間、有限的生命。」

之前傳出過學友籌備緊演唱會嘅消息，呢日佢再鬆口話準備好就會公佈：「不要以為我做過很多次演唱會就可以駕輕就熟，不一樣的演唱會，自然就要面對不同的問題與挑戰。現在可以說的就是，未來半年內我準備開演唱會。」

著名填詞人 鄭國江 一連4場嘅作品音樂會近日舉行，​​第二場表演當中，更邀請多位唱得之人擔任演唱嘉賓，當中好似 林子祥 夏韶聲 曾路得 露雲娜 區瑞強 麥潔文 等都先後現身。

一眾嘉賓分別獻唱了多首鄭國江嘅經典作品，阿Lam就演出咗大家耳熟能詳嘅《分分鐘需要你》同《莫再悲》，又喺觀眾席唱出充滿《東方之珠》。而夏韶聲就表演7、80年代嘅經典作品《童年時》同《交叉點》。

產量無數嘅鄭國江舉行作品演唱會，邀請多位嘉賓獻唱

曾路得就獻唱咗三首感人至深嘅歌曲，分別係《那一天》、《風裡的繽紛》同埋《願》。露雲娜就先後唱出經典動畫《千年女王》同名主題曲同片尾曲《傳說》，仲有陳百強原唱嘅經典金曲《戀愛預告》。

區瑞強就為現場觀眾獻唱多首家喻戶曉嘅民歌，好似《愛在陽光空氣中》、《陌上歸人》、《那天再重聚》仲有好友盧業瑂原唱嘅《泥路上》。麥潔文就為大家獻唱原唱歌曲《萊茵河之戀》，徐小鳳嘅《風雨同路》同梅艷芳嘅《赤的疑惑》。李紫昕就帶領一眾小朋友獻唱一連串經典兒歌，好似《IQ博士》、《小太陽》、《叮噹主題曲》等。

佢哋表演嘅歌曲都出自鄭國江老師手筆，勾起觀眾充滿回憶嘅童年時光。演唱會接近尾聲時，區瑞強代一眾嘉賓們向鄭國江老師獻上一幅寫有「詞名一生」嘅字畫。呢幅字畫上簽滿嘉賓親筆簽名，象徵大家對鄭國江嘅崇高敬意。