StarTalk丨劉浩龍被側田要求除衫錄音 透露近年習慣單身獨處

師兄 劉浩龍 日前作客 TVB娛樂新聞台 節目《StarTalk》，接受 許文軒 訪問，近排劉浩龍開新公司，頭炮出新歌《沒人坐的梳化》，今次搵咗好友側田幫手，原來早喺2006年側田送咗一首《二等天使》畀佢，當時呢首歌係側田寫畀前度女友，忽然畀劉浩龍唱。

相隔5年劉浩龍再推出單曲，亦係老友側田操刀，特意為劉浩龍造歌，劉浩龍分享與側田嘅浪漫關係：「我哋有時食完飯，兩個人去唱K，最大嗰間房可以坐100人，我哋唱咗4個鐘，我哋做嗰啲嘢好浪漫，我同佢都鍾意飲醉酒，我完全唔覺得佢無禮貌，有啲人唔知我哋friend咁，嗰日我未鬧佢轉頭，我唔會忍佢，我都唔好意思，其實大家誤會晒。」

劉浩龍爆被側田要求閂燈除衫唱歌，錄咗兩次就得，劉浩龍當然相信好友側田判斷，劉浩龍坦言跟側田多年老友鬼鬼，從未嗌過交，而且劉浩龍見到側田而家對女朋友嘅改變，佢都好戥朋友開心，見到佢慢慢成長。

劉浩龍近年習慣單身獨處，好少出去自己識朋友，反而結咗婚嘅朋友叫佢盡量歎世界，好好享受自由自在嘅生活。