健康必殺食|6號新節目撇甩肥媽 拍鄭衍峰狂請靚女嘉賓

健康必殺食|6號新節目撇甩肥媽 拍鄭衍峰狂請靚女嘉賓

一向同肥媽合作拍飲食節目嘅 陸浩明 今次有毛有翼喇,新節目《健康必殺食》撇甩老拍檔同 鄭衍峰 合作,食盡靚女嘉賓嘅手勢仲話自己艷福不淺呀。呢日佢哋就同 吳紫韻 鞏姿希 邵初 江嘉敏 林凱恩 黃靖靈 幾位嘉賓一齊宣傳,6號又話位位嘉賓唔係港姐就係女神級,自己只係扮演裝住美味佳餚嘅碟,為各位做陪襯咁話。

咪以為新節目就咁煮吓餸咁簡單,每集佢哋都會有唔同主題,又會去唔同地方搵新鮮食材,而6號同Leonard仲會品嚐嘉賓嘅廚藝,但係講到靚女們嘅手勢,6號就點名 邵初 令人擔心喇。

講明叫「健康必殺食」,就梗係會介紹唔少健康飲食資訊啦,不過身處減肥忍口過程當中嘅 江嘉敏 就投訴淨係得沙律食喇,不過 林凱恩 就解釋有機天然菜一啲都唔平,Leonard仲爆料話一施完肥Kaman就急不及待摘菜嚟食,真係夠晒天然有機呀。

麥明詩盛勁為舉辦婚宴 林作媽媽現身送祝福

麥明詩同盛勁為喺3月24號擺酒舉行婚宴,獲馮盈盈、鄭衍峰、同麥大力擔任兄弟姊妹團,一對新人甜蜜咀嘴,幸福滿瀉,Louisa喺結婚過程中多次開心到喊,好多朋友更祝福佢哋早生貴子,佢哋都話有呢個計劃,仲話會趁婚假養精蓄銳為生BB做足準備。

而呢晚劉佩玥、吳業坤、江美儀、陳庭欣、戴祖儀、郭子豪、鄧卓殷、丁子朗、洪永城、唐詩詠、黃德斌、翁嘉穗同老公都有到賀,但最驚喜嘅莫過於係Louisa舊愛林作嘅媽媽王莉妮現身,原來佢係以Louisa契媽身份送上祝賀,佢更大讚盛勁為好靚仔好型,自己個仔完全比下去,林媽媽仲話覺得好可惜,之前一直好想阿仔箍煲,最終事與願違。不過林媽媽阿仔都有託佢向Louisa送上祝福。

林作同裕美日前post出結婚相,問到林媽媽囝囝係咪都好事近?林媽媽竟然話林作影婚照係因為受到刺激,仲話自己安慰阿仔叫佢睇開啲,至於講到會畀裕美呢個準新抱幾多分?林媽媽似有難言之隱,只係話佢合格咋。

盈盈見證住好姊妹Louisa覓得真愛都好戥對方開心,佢仲話喺一對新人之間嘅互動,已經感受到佢哋係有幾恩愛,佢仲大讚兩人係最佳拍檔。至於兄弟之一嘅麥大力,之前喺美國滑雪傷腳,雖然仲要撐住拐杖,但大力都堅持上陣,認真唔話得,而Leonard就分享咗兩人相處嘅小趣事。

而啱啱再榮升做爸爸嘅洪永城,就再次同大家分享喜悅,佢仲話細女似媽咪多啲,而大女見到妹妹都好開心,仲鍚咗妹妹一啖添。

 相關推薦

熱門搜尋