中年好聲音｜校長金曲戰決出12強 最強成員拍MV商場現身

《中年好聲音》嘅第五部曲次回合《譚校長金曲！爭入12強！》下半部比賽場5號晚播出，一輪激戰過後，12強名單亦正式出爐。而噚晚表現最最亮眼嘅，就係獻唱《半夢半醒之間》嘅李佳喇。

繼續列席比賽嘅校長譚詠麟指，廣東話版《半夢半醒》好多人聽過，但係普通話版嘅《半夢半醒之間》就別有韻味，校長仲即場高歌獻唱咗幾句。擅長唱普通話歌嘅李佳呢晚以一身Bling Bling戰衣上陣，出色演出駕馭整個舞台，最終獲得89分成為整晚最高分參加者，校長仲大讚：「你係一個唱將，一 個好唱得嘅人！」，而評判張佳添同伍仲衡亦分別盛會的讚佢嘅表現。

經過多輪比賽之後，上集奪得91分嘅支嚳儀獲頒為MVP，而魏嘉信、何博文同鮑聖光就被淘汰。

呢集被淘汰嘅魏嘉信，獲太太到場支持，可惜未能更進一步，佢喺在台上發表感言時淚崩話：「老婆，一路都唔想你嚟睇我比賽，係因為唔想你睇到我輸， 反而今日好開心，因為有你喺度，冇晉級到都唔緊要，你一直喺度支持我，解開咗我嘅心鎖。」

之後嘉信再向太太發表愛的宣言：「成個比賽係我同你一齊參加，如果冇你喺背後幫手同支持，冇可能走到呢一步，真係要好多謝我太太，我係好愛好愛好愛你。」場面非常感人。

《中年好聲音》12強選手日前合體拍攝《不再猶豫》MV，3分鐘足本版本將於今晚20:30喺翡翠台首播， See Saw 先 亦會同步播出。由12位參加者合唱嘅《不再猶豫》版本，由評審之一；資深音樂製作人 伍仲衡 重新編曲， 有別於原唱 Beyond 的版本，細緻嘅音樂鋪排充分表現出 「好聲音」成員追夢嘅心路歷程，Harry又為12強精心分配一人一句獨唱，以突顯各人特色同長處。

佢哋MV中嘅造型亦非常特別，12強選手一齊化身Rock仔、Rock女，以紅、白、黑為造型主色調，再配以皮褸、鉚釘等元素，型爆十足。而拍攝MV嘅製作過程亦剪輯成《中年好聲音 不再猶豫 越戰越強》節目，今個星期五(10號)晚23:55播出。

除此之外，今日傍晚19:00，12強選手會一齊現身商場同觀眾見面，到時TVB娛樂新聞台會現場直播，記得留意喇。