廖子妤生日望好友成功衝擊金像獎 余香凝踢爆老公做facial陪自己行紅地氈

防疫措施鬆綁，唔少朋友都以除低口罩見面相聚，古天樂旗下嘅公司日前舉行春茗，旗下大班藝人  余香凝 廖子妤 陳穎欣 吳嘉禧 麥子樂 徐頴堃 余潔滢 李月兒 林嘉宏 劉志偉 林宜臻 都有出席。工作人員仲特別為入圍角逐金像獎女配角嘅Jennifer 同三月壽星Fish送上驚喜蛋糕同乳豬慶祝，Fish許願時仲希望好姊妹Jennifer可以喺金像獎中得獎呀。
 
舊年對Jennifer同Fish都係成績豐收一年，有三套電影上映嘅Jennifer，分別入圍角逐金馬同金像獎獎項，而Fish舊年唔單止勇奪金像獎最佳女配角殊榮，主演嘅電影《梅艷芳》同《毒舌大狀》亦同樣叫好叫座，難怪Fish笑言係自己人生巔峰期，覺得過去一年好似行運咁喇。

雖然自入行已相識嘅佢哋各自忙碌，見面時間唔多，不過就無礙佢哋嘅姊妹情，Jennifer話：「今年我哋係少咗傾偈，所以一約食飯，我哋會由中午開始一直傾到夜晚8、9點。」Fish就話由對方18歲認識至今，見證住大家嘅不同階段，感覺好有趣，仲笑言更希望見證大家慢慢一齊老花咁話呀。

雖然3月啱啱先嚟到，不過Fish就話工作已排到8月，啱啱完成一部舞台劇演出嘅佢，期望可以再接演舞台劇，Fish話：「雖然排舞台劇好攰，但學到好多嘢，喺能力、情緒各方面都好似急速成長；而我今年希望打破之前話唔唱歌嘅說法，接觸吓唱歌，睇吓公司畀唔畀。」

而Jennifer就提到自己角逐金像獎女配角嘅信心喇：「做人要有信心，不過我都有睇其他入圍演員嘅演出，個個都好好，我特別喜歡王菀之，所以無論邊個得獎都係實至名歸；今年我會帶埋先生一齊行紅地毯，佢好緊張，而家已經做咗幾次facial。」
 
至於Yanny同Cheronna對相隔三年再次有春茗非常興奮，一向唔太飲酒嘅Cheronna，都輕酎同樂，仲被Yanny踢爆微醉。Cheronna今年會繼續錄新歌推出更多作品，而Yanny就會繼續主打拍攝工作，5、6月會為電影演出，佢話今次角色非常新鮮，令自己非常期待呀。