廉政狙撃｜傅嘉莉珠胎暗結招殺身之禍 黃智賢奸險上流智鬥王浩信

傅嘉莉 喺《廉政狙擊》嘅藝術品洗黑錢個案去到尾聲，而6號播出嘅一集，ICAC經調查後扣查在詩等人，被扣留期間佢仲發現懷有卓日升( 高鈞賢 飾)骨肉，呢件事仲令卓廷光( 黃智賢 飾)非常不滿，在詩仲因而招來殺身之禍，最終失足碌落山慘死。

雖然Kelly出場只得四集，不過表配就喺內地同香港都引起好大迴響，佢同Ben嘅「鈕扣對峙」場面，喺TVB社交網重播後反應熱烈，兩日勁吸近四十萬點擊，留言除咗大讚Kelly身形完美，又讚佢演技大有進步，表情層次變化豐富。

而講到山坡戲拍攝花絮，Kelly就憶述當日喺大帽山拍攝時相當大霧，所以一直拍吓停吓，唔止髮型難以連戲，就連情緒都斷斷續續，好彩最後都順利完成：「我哋好多次因為朦到拍唔到，鏡頭直頭見唔到我同阿Ben個樣，又要偷陽光拍。嗰場係我嘅煞科戲，我其實好緊張，無奈天氣令到我講一句嘢就要 cut機，頭髮都Drop晒唔連戲，但又反而多咗份滄桑淒美感。」Kelly仲話要感激替身師傅瞓身演出。

Kelly對網民大讚演技坦言非常開心，一直喜歡演戲嘅佢，仲話希望之後再有突破。而身材保養一流嘅佢，仲話除咗每日堅持做運動冋多飲滋潤湯水外，仲要早睡早起：「自從一個英國同國際認可嘅讀咗珠寶鑑證師課程，呢一、兩年我早睡早起咗，否則記性冇咁好。」

同場嘅 阿Ben黃智賢一樣贏盡讚賞，簡單幾句對白同富張力嘅眼神，已將緊張氣氛推向爆發邊緣，觀眾仲話難得奸險嘅Ben「奸得嚟有型有款」。而講到角色入屋時，Ben就話要多謝導演嘅信任喇：「造型時已經同佢哋溝通定，傾吓點塑造角色，可以邊度加啲減啲，都傾咗好多偈。」

阿Ben仲話為配合角色髮型刻意減肥：「初初試造型時，樂小姐同造型師想我有啲白頭髮，但就想我長頭髮。當時我就諗既然係咁不如剪短晒佢，但咁樣塊面一肥就好覺，所以要減吓。造型出咗嚟大家都鍾意， 感謝造型師每次開工都花兩小時幫我整頭同化妝。」

Ben仲話自己冇刻意為角色定忠奸，最重要係有血有肉：「所以我對羅霖一個態度，對兩個仔態度又唔同，咁會令到角色立體啲。反派人物要畀到壓力出嚟，場戲先至成立，所以呢方面我有去思考點做。」

至於今晚播出嘅一集，阿Ben將會再同Kelly激烈對峙，佢被扣查時呎喺盤問室冋韋Sir( 王浩信 飾)嘅「互拋浪頭」亦相當精彩；為咗掩飾罪行Ben飾演嘅卓廷光全程否認指控，不過幾個微表情就暴露暗藏內心嘅動搖同不安，為咗貫徹高傲人設，廷光強辯同時仲表達出對韋Sir嘅藐視，令簡單一個盤問場面非常緊湊。

而今次亦係阿Ben同羅霖相隔27年後再度合作，今次佢哋升呢飾演默契十足嘅上流社會夫妻，表面似一凹一凸非常合拍，不過羅霖嘅角色其實深藏不露，稍後仲會展現驚人「賢內助」功力，協助Ben「斬除禍根」。

《廉政狙撃》星期一至五晚21:30 翡翠台