隱形戰隊丨唐詩詠單腳拱橋晒驚人腰力劉穎鏇跣膝飛撲捉喪屍NG咗32次

由文偉鴻（Jazz）監製嘅《隱形戰隊》，噚晚（6 日）起逢周一至五晚八點半翡翠台播映，主要演員包括馬國明、陳山聰、陳展鵬、江美儀、唐詩詠、劉佩玥、劉穎鏇、林子善、歐瑞偉、樊亦敏、伍樂怡、郭子豪、楊證樺及程可為等，《隱形戰隊》首播獲讚節奏明快緊湊。

唐詩詠同劉穎鏇合力制服由副武指慧慧飾演的喪屍
劉穎鏇獲封「性感打女」
噚晚（6 日）呢集內容緊湊，除咗有大量重要角色登場，更有大型「喪屍」襲擊群眾場面，事件驚動衝鋒隊督察 Madam Q 阿寶（唐詩詠飾）及反恐特勤隊（Counter Terrorism Response Unit｜簡稱 CTRU ）成員邢風（劉穎鏇飾）加入協助，最終二人合力制服「喪屍」，唐詩詠一招單腳企「拱橋」，盡顯驚人腰力。

詩詠呢招單腳企「拱橋」，盡顯驚人腰力。

而劉穎鏇登場相當具氣勢，邊奔跑邊拋掉外套，一個飛身雙膝貼地向前滑動，同時一個箭步已將目標箍緊及制服，盡顯孔武有力一面；劉穎鏇打得又睇得，更獲封為新一代「性感打女」，原來一個簡單「跣膝」動作，背後要付出大量努力，劉穎鏇受訪時透露相關動作係臨時加插，笑指當初對「跣膝」Mission 充滿期待：「嗰場戲我哋拍到中午時已經非常熱，嗰日太陽好猛，當我知道有呢個動作時，初頭係好興奮嘅，因為我以前打開波，有時都需要跣住去救波，呢個動作我都熟悉嘅，武指仲畀咗兩個Knee Pads我添。」

Tiffany就硬食咗 32 下 NG，同無數心理壓力。跣完膝仲要即時出手鉗實喪屍，再做出「大迴環」動作揈走個喪屍，真係少啲臂力、背肌力同腰力都唔掂

劉穎鏇又指整個動作難度在於角度及各方面配合：「嗰刻最難係點 make sure 每次停低都係停啱同一個位，同埋捉住佢（喪屍）又揈開佢個力度應該點掌握，嗰一下總共拍咗 32 takes。」劉穎鏇喺唔使埋位時，已反覆練習相關動作：「由最初頭覺得好得意，最尾係變咗不斷諗點樣可以做啱件事，又要顧埋面部表情，都拍咗好耐，我嗰一刻已經完全忘記咗時間。」佢又感激飾演喪屍嘅副武指周穎箖（慧慧）：「慧慧好辛苦，佢吓吓都真跌，我都會好擔心佢整親，同擔心佢攰。佢真係好好，非常配合我，仲好有耐性咁教我，成件事拍到成果係要非常感激所有人咁配合同團結。」

唐詩詠飾演衝鋒隊督察 Madam Q 喬寶寶。

錢嘉樂愛徒慧慧飾演「喪屍」

錢嘉樂愛徒飾演「喪屍」

其實慧慧係圈中難得一見嘅女武指，擔任特技演員經驗超過 20 年，曾為無數女演員做過動作替身，佢係香港著名動作指導錢嘉樂愛徒之一，之前更因有份參演TVB綜藝節目《不可能任務》及《360 秒人生課堂》逐步為觀眾熟悉及關注，是不折不扣女硬漢。

慧慧《360 秒人生課堂》（資料圖片）

慧慧《不可能任務》（資料圖片）

噚晚揭開四位主角 Ocean（馬國明飾）、Cool Sir（陳山聰飾）、Madam Q 及囡囡（林子善飾）嘅「子彈情仇」。首集身份成謎嘅 Ocean，原來多年前與三名好友執行任務期間，向囡囡膝頭開咗一槍，由於動機成疑故噚晚喺網絡引起一定討論。

囡囡嘅重傷導致兄弟決裂由於動機成疑故昨晚在網絡引起一定討論

最終囡囡因傷勢嚴重被迫截肢，無論活動能力或職場生涯均因而大受影響。每次子善出場均十分催淚，無論係趷腳定係雙手配合動作均相當像真，讓觀眾能輕易代入其角色處境；而囡囡截肢後嘴唇發白、臉如死灰般躺喺床上，呢幕更係讓人十分心痛。談到飾演截肢角色，子善透露係因太長時間投入角色，以致拍畢後一時三刻未能完全「戒掉」趷腳習慣：「我有幾次趕港鐵（北角轉將軍澳），我跑跑吓都留意到自己不自覺趷腳，因為嗰三、四個月每日開工好長時間，習慣咗趷腳。後尾拍完套劇個零月，耐唔耐都仲會有少少趷腳，我老婆都問我做乜趷腳，我都係佢問先知自己趷咗。」

單係子善嘅行路畫面，已經好催淚。子善劇入面因為行動不便，所以成日畀人撞跌；而今次因為畀自己鍾意嘅女仔見到狼狽一面，所以囡囡感到難堪。為配合截肢角色，子善每做一個動作之前，都要諗清楚如果真係截咗肢，個動作會同一般人有乜嘢分別，同埋要時刻謹記係咪有啲動作會做唔到，的確係好費神嘅一個角色。