Gigi翻唱哥哥名作《今生今世》 原作許愿大讚情感表達細膩

今年係哥哥張國榮逝世20周年，唔少新生代歌手應邀重唱當年哥哥嘅經典歌曲，輯錄成專輯作紀念，其中已確認將出席致敬音樂會嘅 炎明熹 ，翻唱嘅《今生今世》早前一喺網上推出就大受歡迎，而創作原曲嘅 許愿 亦都大讚Gigi嘅表現呀。

Gigi去年喺參加《聲生不息》認識許愿，原來當時已經受到對方唔少指導，除咗唱歌就連台上表現都一樣有意見提點自己，到今年竟然有機會可以翻唱佢同哥哥當年嘅名作，就更加榮幸喇。

雖然原作者都讚，但係Gigi就話仲覺得可以表現得更好，仲話往後有機會一定會再改進咁話。佢又話因為《今生今世》係大家耳熟能詳之作，所以要翻唱有唔少壓力，不過同時又希望可以表達唔同嘅味道呀。

新歌MV當中亦刻意營造懷舊感，好似衣著同電話亭都係昔日產物，而Gigi拍攝時都覺得非常有趣呀。