StarTalk丨郭富城床下戲打得激烈 林家棟難忘網絡森林搏命跑

StarTalk丨郭富城床下戲打得激烈 林家棟難忘網絡森林搏命跑

郭富城、林家棟及任達華主演嘅網路犯罪為主題嘅電影《斷網》,郭富城同林家棟飾演網絡專才,有不少激烈打鬥場面,電影講述黑客以驚人速度及技術入侵國際金融機構,任達華飾網絡安全調查科督察, 與二人穿梭網上與現實世界,互相角力鬥智鬥勇,展現非一般嘅警匪網絡戰。

林家棟演網絡保安公司主管,笑言係反派角色,與「正派」郭富城起衝突,郭富城飾演天才網絡保安員,主要負責寫程式對抗外來嘅黑客,不幸被利用去犯罪;電影用南生圍實景建立網絡森林,演員為呈現速度感搏命跑,林家棟笑指導演將攝影機放電單車尾,要郭富城同林家棟跟住鏡頭快跑,追嗰架電單車。

郭富城同林家棟喺床下戲,上演激烈打戲,林家棟帶傷上陣,郭富城稱原本一場戲講佢要撞家棟埋牆,用替身拍咗廿幾次都唔收貨,結果林家棟親身演出,導演先收貨,林家棟解釋導演好渴望演員親身埋位,此外,郭富城直認電話變咗微型電腦,習慣依賴網絡,佢呼籲粉絲驚惕騙案!

陳淑芬雙喜臨門廣邀好友聚餐 神隱甄珍罕有現身談與劉家昌官司

陳淑芬為慶祝入行50年兼3月22號嘅70歲生日,喺21號晚筵開30幾席,廣邀好友同工作伙伴聚餐。細心嘅陳太仲邀請埋21號生日嘅閻奕格同B哥哥囡囡鍾嘉晴一齊切蛋糕,佢又安排八位自己漫畫造型嘅舞蹈員向老公送上驚喜。

陳太知道好友狄波拉係譚輝智同《中聲2》嘅Fans,所以邀請咗《中聲2》唱將擔任嘉賓獻唱,連修哥胡楓都上台助興。呢晚到嚟嘅嘉賓星光熠熠,包括唐鶴德、袁詠儀、甄子丹夫婦、佘詩曼、郭富城、米雪、鄭嘉穎夫婦、陳松齡同老公、姜大衞一家同甄楚倩等,另外同前夫劉家昌展開爭產訴訟嘅甄珍都罕有現身,佢解釋因為仔仔無被邀請,所以未有同行。至於大家都好關心嘅家事,甄珍就話官司仲進行中,自己嘅心情就未有受到太大影響。

同樣久未喺香港露面嘅仲有甄妮,不過佢就婉拒訪問直接入會場。而同場出席嘅就有曾經被佢批評過嘅王力宏。王力宏透露自己好期待再嚟香港會歌迷,不過當媒體一講到甄妮嘅名,佢就即刻掉頭走喇!

著名歌手Paul Anka將名曲《My Way》改歌詞送畀陳太做生日禮物,令陳太受寵若驚。陳太話好感激各方好友應邀出席,當中有唔少人仲係多年冇見嘅舊朋友,好似柏安妮,仲帶上囡囡一齊出席添。

 相關推薦

熱門搜尋