容祖兒美加行程慘被搶手袋失證件 巴黎時裝周喜與黃偉文蔡卓妍睇靚衫行街

容祖兒（Joey）出發前往新加坡，舉行一連兩場《Pretty Crazy演唱會世界巡迴演唱會》，緊接4月中將於澳門演出8場演唱會，行程忙碌到爆炸。 疫情完結，世界各地歌迷等到頸都長，祖兒世界巡迴演唱會終於再啟動，早前佢已經到馬來西亞、大西洋城，拉斯維加斯，Reno、溫哥華、多倫多等演出共8場。

容祖兒今次喺新加坡舉行2場個唱，4月又到澳門一共演出8場《容祖兒Eternity演唱會》，佢下半年將去澳洲。祖兒剛喺巴黎時裝周回來，此行跟阿Sa（蔡卓妍）攝時間shopping及享受美食，最開心係可以去英國見老朋友黃偉文，相約作曲人翁瑋盈一齊喺英國飲茶，祖兒表示十分開心：「Pretty Crazy演唱會個陣，翁瑋盈個BB仲係佢個肚裡面，依家再見已經係一個三歲多小朋友，見到面大家都感覺時光飛逝，好珍惜可以相聚光陰。Wyman好好，畀咗好多意見我呀！上次Pretty Crazy演唱會都係佢做形像總監，今次我照佢意見，去睇咗好多靚衫，為嚟緊演唱會準備。」

早前飛往美加巡迴，祖兒指當中有好多難忘回憶，做騷之餘，有時間留喺當地休息幾日，再去另一個城市，呢啲空檔日子，讓佢喺多倫多睇咗BLACKPINK演唱會，又於LA睇咗The Weeknd演出，The Weeknd八萬人嘅演唱會尤其讓佢震憾，「入到去個場，我坐喺下面望上去觀眾席，覺得人群係坐喺天際一樣。Weend把聲又有感染力，現場氣氛又好到不得了，最驚嘆係咁多人都秩序良好，個騷同樣係幫我設計Pretty Crazy舞台嘅Es Devlin設計舞台，所以製作當然係一流啦！」 祖兒觀摩其他國際巨星演出，每次都有吸收及新領悟，學到唔少嘢，佢亦見到即將誕生的明日之星：「我喺加拿大仲去咗兩間著名大學，佢哋搞廣東歌比賽，邀請我去做頒獎嘉賓，班小朋友又年青又有活動，個個對唱歌好有熱誠。」

今次美加行程，祖兒發生咗小意外：「因為等上機有幾個鐘，於是我哋喺機場附近去食啲嘢。冇諗過返嚟，發現接我哋嘅保母車，我坐嗰個位置車窗俾人打爛，把我個手袋被搶走。」祖兒指其實司機一直喺車上，但當佢反應過來，只係來得及下車喝罵打爛車窗嘅賊人，保住佢哋所有行李，但保唔住我個手袋。手袋係新嘅，我好朋友送畀我，裡面有證件同少少現金。幸好我個passport喺身上，失咗身份證也可以上機回港。不然就慘啦 !而我嘅好朋友知道呢件事之後，竟然馬上又寄咗一個一模一樣嘅新手袋畀我，真的讓我好感動。大家都係話，最緊要人冇事。所以今次喺巴黎落倫敦，我哋坐火車都好緊張自己行李。」