郭富城賭城展開全新巡唱 舞衣舞台全新打造舞林外傳

郭富城賭城展開全新巡唱 舞衣舞台全新打造舞林外傳

郭富城相隔三年之後,近日再次展開新一輪世界巡迴演唱會,日前首站就係賭城拉斯維加斯演出。今次命名為「舞林外傳」世界巡演係疫情之後Aaron嘅第一個大型巡演,佢同團隊籌備咗接近一年,為今次表演作全新編排,配合嶄新視覺特效、服飾造型等等,希望帶俾大家一個充滿動力動感嘅演唱會。

郭富城於賭城展開全新世界巡迴演唱會

Aaron為咗增添新元素,今次同三位新銳年青形象指導同設計師合作,設計特色舞台表演服裝,好似有黑豹元素嘅「閃紫豹紋舞衣」、「西部牛仔造型」同埋賽車手元素嘅「烈火戰衣」等,Encore部分Arron就換上一身繽紛棒球造型演繹《著迷》同觀眾互動。

Aaron暌違三年嘅賭城首演,全場過萬座位座無虛席,觀眾由一開場已經全場同Aaron合唱,反應非常熱烈,雖然主辦單位為鼓勵環保未有派發螢光棒,不過觀眾就以手機自製燈海,令現場氣氛非常浪漫。

當中大部份舞衣同表演都係全新編排

演唱會期間唔少歌迷又欲同Arron握手同送禮物,可惜因為場館未「批准」握手環節,Aaron只可以經工作人員接收禮物,不過唔料歌迷依舊冒被保安攔截衝向台前非常熱情。Aaron仲笑言希望各地場館都可以盡早重啟「握手」環節呀。

Aaron話:「好開心再次啟動世界巡迴演唱會,第一站已經被觀眾嘅熱情深深打動,舞台永遠係充滿能量嘅地方,我會繼續做好每一個演出,答謝所有支持者。」完成拉斯維加斯站之後,Arron同團隊就會啟程前往芝加哥,繼續演出,之後就會轉往大西洋城同多倫多站。

陳淑芬雙喜臨門廣邀好友聚餐 神隱甄珍罕有現身談與劉家昌官司

陳淑芬為慶祝入行50年兼3月22號嘅70歲生日,喺21號晚筵開30幾席,廣邀好友同工作伙伴聚餐。細心嘅陳太仲邀請埋21號生日嘅閻奕格同B哥哥囡囡鍾嘉晴一齊切蛋糕,佢又安排八位自己漫畫造型嘅舞蹈員向老公送上驚喜。

陳太知道好友狄波拉係譚輝智同《中聲2》嘅Fans,所以邀請咗《中聲2》唱將擔任嘉賓獻唱,連修哥胡楓都上台助興。呢晚到嚟嘅嘉賓星光熠熠,包括唐鶴德、袁詠儀、甄子丹夫婦、佘詩曼、郭富城、米雪、鄭嘉穎夫婦、陳松齡同老公、姜大衞一家同甄楚倩等,另外同前夫劉家昌展開爭產訴訟嘅甄珍都罕有現身,佢解釋因為仔仔無被邀請,所以未有同行。至於大家都好關心嘅家事,甄珍就話官司仲進行中,自己嘅心情就未有受到太大影響。

同樣久未喺香港露面嘅仲有甄妮,不過佢就婉拒訪問直接入會場。而同場出席嘅就有曾經被佢批評過嘅王力宏。王力宏透露自己好期待再嚟香港會歌迷,不過當媒體一講到甄妮嘅名,佢就即刻掉頭走喇!

著名歌手Paul Anka將名曲《My Way》改歌詞送畀陳太做生日禮物,令陳太受寵若驚。陳太話好感激各方好友應邀出席,當中有唔少人仲係多年冇見嘅舊朋友,好似柏安妮,仲帶上囡囡一齊出席添。

 相關推薦

熱門搜尋