正式開幕嘅香港國際影視展當中，唔同公司都公告來年將會展開嘅唔同影視作品，其中現身 紫荊文化嘅發佈會，除咗有 曾志偉 同 樂易玲 帶領一班TVB藝員現身《灣區升明月》嘅啟動禮之外，最矚目嘅一定係 李治廷 突然宣佈已婚消息喇。

近年主力內地發展嘅佢，呢日為新作宣傳時，就提到因為早前被偷拍亂傳有新女友，而幾個月前已經同圈外女友結婚嘅佢，就決定要將婚事公開，務求太太安心，仲話其實同太太婚前拍拖已經幾年，亦都話有計劃生小朋友呀。

雖然呢日公開關係，不過佢就話太太始終係圈外人，所以會繼續保護太太嘅私隱喇。而同場仲有未有受訪嘅 陳小春 同 任達華 仲有 熊黛林 一齊為劇集宣傳，華哥仲指新作會將香港嘅美麗帶俾大家呀。

早前宣佈4月24號舉行婚禮成婚嘅 陳家樂 同 連詩雅 ，成為夫妻嘅日子進入一個月倒數。正當忙住各項準備功夫嘅時候，26號佢哋亦正式過大禮，家樂喺幾位朋友著晒紅色波衫夠晒喜慶嘅氣氛之下，拎住多到冇地方擺嘅禮餅同首飾龍鳳鈪，去女家舉行儀式。

家樂搵埋一班好兄弟幫手，拎住大量喜餅金飾去女家過大禮

之前每次做訪問都非常淡定回應嘅家樂，仲話緊張到瞓唔到覺，而Shiga亦都將嫁喜餅同龍鳳鈪排到靚一靚影相，見多對龍鳳鈪加埋金豬牌同其他首飾，真係氣勢十足呀。

Shiga就同媽咪一齊著到紅噹噹迎接，仲將海味呀、喜餅同金器掛好哂影相

早前開完婚前派對大曬長腿嘅準新娘，仲話就快成為新外母嘅媽咪比自己更為緊張，而佢哋仲話婚前非常忙，要多謝各位兄弟姊妹幫手咁話呀。