請1日假去旅行丨李芷晴生日獲半裸猛男圍攻何沛珈笑言對手濕晒

同大家請一日假去過日本、韓國旅行，16號晚播出嘅一集，就同大家請一日假去曼谷喇！
落機就去咗猛男餐廳。
今個星期播出《請1日假去旅行》嘅「曼谷篇」，由《香港小姐再競選》嘅冠、亞軍Roxanne何沛珈同 Stephanie李芷晴擔任主持。由於到埗當日係Stephanie嘅正日生日，所以 Roxanne同製作組就為佢送上驚喜，佢哋去到猛男餐廳介紹食物時，一堆猛男就「圍攻」Stephanie跳舞，兩位靚女仲被猛男捉手仔去摸佢哋胸肌，事後Roxanne 笑言：「佢哋好濕，因為啲汗，搞到我隻手都濕埋！」
由於當日係Stephanie正日生日，所以製作組為佢準備咗驚喜。相信呢信生日壽星女一定好難忘。
嫌猛男餐廳太刺激眼球嘅，不如轉為同着上泰國大學校服嘅Roxanne 與 Stephanie，去到當地著名學府朱拉隆功大學打卡，再排隊幫襯米芝蓮推介嘅海鮮媽媽麵。自言有好多年冇着過校服嘅Roxanne ，就話成件事好有重拾青春嘅感覺，加上同Stephanie喺校園走嚟走去，令佢諗起中學時期嘅閨密喇。至於Stephanie就話拍完節目先知泰國嘅大學生要着校服，佢仲話如果再拍啲 Mood Shot，成件事就會好似拍緊青春校園劇咁呀！
兩位着上泰國大學校服去打卡。好似拍緊校園劇咁。
嚟到泰國點會唔同陽光玩遊戲？所以Roxanne 同Stephanie轉眼間就換上泳衣，喺酒店泳池大騷Fit爆身材。之後佢哋又去到商場推介嘅泰國潮牌泳衣揀衫，呢個品牌除咗款式多多兼價錢唔算太貴外，最大賣點係泳衣着重腰身設計、突顯女性嘅曲綫，搞到自認有選擇困難症嘅 Stephanie好難擇。
去到泰國當然要泳下水同埋曬下太陽。
之後佢哋又去咗一間森林 Café 打卡，呢Café最大特色係可以撐船仔泛舟河上，打起卡嚟就相當靚喇，但 Stephanie就話其實有苦自己知：「一開頭以為可以好優雅咁撐船仔傾吓偈，點知我哋撐到身水身汗嗌晒救命，都幾難忘！」

《請1日假去旅行》逢星期四、五 22:30 翡翠台