去年底喺美國登台後因為汽車失竊手袋被搶走嘅 容祖兒 呢日同韓星 全昭彌 同門嘅 Gin Lee 等一齊現身活動，Joey仲回想美國手袋被偷走嘅經歷，當時信用卡同隨身物品被偷走，但係返港補領身份證後，先發現原來舊證一直跟身冇唔見，認真大頭蝦呀。

而佢現身巴黎時裝周時，又被網民指被合照男非禮，不過Joey呢日就為對方澄清，其實對方係認識多年非常熟絡嘅新加玻攝影師 Lesley Kee，不過都要多謝大家關心，當時只係因為太耐冇見，大家都好掛住對方之故咁話。

而Somi今次來港，除咗現身活動之外，佢仲抽時間到處遊覽，佢仲話非常鍾意香港嘅美食，仲話香港風景亦都非常吸引，仲話有計劃喺香港開音樂會或者Fans見面活動呀。亦都提到希望再同I.O.I.嘅隊友合作呀。

早前宣佈同拍拖10年嘅ToNick成員 恒仔 分手嘅 譚杏藍 ，呢日就話佢哋分手已經一段時間，大家依然保持好友關係，雖然未有透露原因，不過就會繼續祝福對方呀

聲帶舊年已經出問題發炎嘅 張天賦 早前又覺得有啲唔舒服，但係大家就可以放心，因為經檢查後發現完全冇事，可能只係自己太擔心咋。

欣宜嘅第二場紅館演唱會，吸引一班老友好似 毛舜筠 容祖兒 許廷鏗 等到場支持，大家亦都投入到齊齊企晒起身跟住主角Joyce勁歌熱舞。繼第一場邀請咗Do姐擔任嘉賓快問快答之後，呢一晚就由 鄭中基 接力上場，到Encore時欣宜仲走勻四面台，同Fans握手多謝佢哋支持呀。