舊年前月突然宣佈同日本女友 浜口愛子 結婚嘅 吳業坤 ，婚後太太移居香港，之前仲為坤歌新歌MV擔任女主角，正式百分百係夫唱婦隨喇。而3月15號佢哋就喺香港補辦婚禮，正式向吳媽媽斟茶，而新娘嘅父母同佢哋嘅日本好友亦都來港見證。

呢日佢哋以襯到絕嘅西裝同低胸婚紗現身同傳媒見面，又多次應要求錫錫。而早前嘅儀式亦跟足傳統，新人以傳統中式裙褂出席，坤哥仲話媽媽一飲新抱茶仲非常高興感觸呀。

坤哥為咗送驚喜，仲一早準備太太偶像嘅一首日文歌曲，喺現場同Live Band演奏之下送上自己無比嘅愛呀。不過佢就話希望等自己事業再穩定一啲之後先再生小朋友，暫時計劃就打算3年後再努力造人喇。

近日將要拍攝《新聞女王》嘅佢，又話要隨即要加入劇組拍攝，所以度蜜月都要再等工作鬆動啲先再安排喇。

去年未有機會親身祝賀嘅圈中好友，好似 伍仲衡 鄭世豪 鄭俊弘 陳惠敏 等呢日就紛紛去到現場送上祝福，而 薛家燕 雖然眼睛發炎，呢日都同 陳敏之 一齊到賀呀。喺劇集《飛虎II》扮演過一對父子嘅 陳山聰 仲話好似娶新抱一樣，所以就算開工都要搵時間親身到場。

而 譚俊彥 就透露婚宴現場情況，仲爆新外父似乎非常想抱孫，用英文猛講Baby呀，至於 胡鴻鈞 就話叫好兄弟早生貴子，希望佢早日升呢做爸爸呀，仲大讚新娘係百分百賢妻咁話呀。

日前喺香港正式宴請親友舉辦婚禮嘅 吳業坤 同太太 浜口愛子 ，依然沉浸喺新婚喜悅當中，呢幾日佢哋持續Post出之前未公開嘅系列婚照，亦都繼續再次多謝親友同各界對佢哋嘅祝賀呀。

新婚咁開心，係抵坤哥坤嫂曬吓幸福嘅

佢哋日前公開咗喺中西區一帶；以電車同香港知名摩天大廈作背景嘅婚照，坤嫂仲不經意展示驕人身材，亦都以日文留言講到，非常多謝大家給予力量同出席婚禮呀。而坤哥亦都提到太太非常鍾意香港生活帶俾佢嘅感覺，仲對連日以婚照洗版覺得唔好意思咁話呀。

祝佢哋兩位恩愛幸福，白頭偕老